“Dunyo bo‘ylab” телеканалининг “Своими глазами” дастури мухбири Рамина Ягафарова 31 ёшида вафот этди. Унда антибиотик дори қабул қилинганидан кейин аллергик реакция кузатилган ва журналист анафилактик шокни бошдан кечирган.

Маълумотларга кўра, 13 сентябрь куни Тошкентда “Dunyo bo‘ylab” телеканалининг “Своими глазами” (Ўз кўзингиз билан) дастури мухбири Рамина Ягафарова 31 ёшида вафот этди. Бу ҳақда 14 сентябрь куни журналист Элмира Тухватуллина маълум қилди.

Унга кўра, 12 сентябрь куни кечқурун Рамина Ягафарова онасини кўриш учун Чилонзор туманидаги хусусий клиникага келган. Томоқ оғриғи туфайли журналист левофлоксацин (антибиотик) таблеткасини олган. Тахминан 10-15 дақиқадан сўнг уни тутқаноқ тутиб, ҳушидан кетган.

Клиника шифокори унга биринчи ёрдам кўрсатган, шундан сўнг Ягафарова реанимация бўлимига жойлаштирилган. Тиббий муолажалардан сўнг у ҳушига келган, аҳволи яхшиланган.

Бироқ 13 сентябрь куни тушдан кейин уни яна тутқаноқ тутган. Тиббий муолажаларга қарамай, у тахминан соат 17:50 да вафот этган, дея изоҳ берди туман прокуратураси.

Суд-тиббий экспертиза хулосасига кўра, ўлим дори-дармонларга аллергик реакция (левофлоксацин), мия ва ўпканинг ўткир шишиши, ўткир нафас ва юрак-қон томир етишмовчилиги, анафилактик шок оқибатида юзага келган.

Чилонзор тумани прокуратураси ҳодиса юзасидан терговга қадар текширув ўтказмоқда.

“У каналимизга яқинда келганди, лекин жамоага тезда қўшилиб кетди ва унинг ажралмас қисмига айланди. Бу вақт давомида мен у тайёрлайдиган дастурлар муҳаррири эдим. Журналист эмас, балки касби бўйича филолог бўлган Рамина тележурналистика асосларини ўзлаштириб, кўз ўнгимизда ўсди”, – деб ёзиб қолдирган Элмира Тухватуллина.

• Dunyo bo‘ylab
• O'lim
• Шифокор
• Tez tibbiy yordam