ИИББ ахборот хизмати хабарига кўра, кеча, 26 март куни Тошкент шаҳри Юнусобод туманида Tracker ҳайдовчиси бир нечта фуқарони уриб юборгани юзасидан жиноят иши қўзғатилган.

Маълум қилинишича, ижтимоий тармоқларда тарқалган видео юзасидан ўрганиш ишлари олиб борилган. Ҳодиса тумандаги Ниёзбек йўли ва Халқобод кўчалари кесишган чорраҳада содир бўлган. Воқеа жойига етиб борилганида, фуқаролар ўртасида келишмовчилик оқибатида жанжал юзага келгани аниқланган. Жанжал якунланиш арафасида бўлган пайтда Tracker ҳайдовчиси ҳаракатланиб келиб, тўрт нафар фуқарони уриб юборган. Ҳодиса жойидан зарур далилий ашёлар расмийлаштириб олинган.

Мазкур ҳолат юзасидан туман прокуратураси томонидан Жиноят кодексининг 25-моддаси орқали 97-моддаси (қасддан одам ўлдиришга уриниш) ҳамда 277-моддаси (безорилик) билан жиноят иши қўзғатилган. Ҳозирда тергов ҳаракатлари олиб борилмоқда.

• Ҳайдовчи
• Жиноят
• Тошкент
• Юнусобод тумани