Тошкент шаҳар ҳокимлиги матбуот хизматининг маълум қилишича, пойтахтда жамоат транспорти бекатлари ҳудудида жойлашган савдо объектларини босқичма-босқич олиб ташлаш режалаштирилмоқда.

Маълумотларга кўра, ўтказилган ўрганишлар натижасида бекат мажмуаларида жами 110 та савдо объекти фаолият юритиб келаётгани аниқланган. Уларнинг аксарияти турли хил маҳсулотлар савдоси билан шуғулланувчи тижорат дўконларидан иборат.

Текширув давомида 110 та савдо нуқтасидан 61 таси бекат ҳудудидан фойдаланиш ёки уни тасарруф этиш ҳуқуқини тасдиқловчи ҳужжатларни тақдим эта олмагани маълум бўлган. Мазкур ҳолатлар юзасидан ҳуқуқий баҳо берилиб, қонунчиликка мувофиқ тегишли чоралар кўрилиши кутилмоқда.

Шаҳар маъмурияти қарорларига мувофиқ, келгусида барча жамоат транспорти бекатлари босқичма-босқич янгиланади. Рухсат берувчи ҳужжатларга эга тадбиркорлар учун эса савдо нуқталарини бошқа ҳудудларга кўчириш орқали компенсация бериш механизми жорий этилиши режалаштирилган.

Ушбу чоралар жамоат транспорти инфратузилмасини тартибга солиш, йўловчилар хавфсизлигини таъминлаш ва бекатлар атрофидаги тирбандликни камайтиришга қаратилган.

• Автобус
• Тошкент
• bekat