2025 йилнинг 13 март куни Telegram ижтимоий тармоғида “Тошшаҳартрансхизмат” АЖнинг “2-Автобус саройи” филиали тасарруфидаги, Ютонг русумли, давлат рақами 01|472 АЛА, сарой рақами 766-бўлган 72-сонли йўналишда ҳаракатланувчи автобус ҳайдовчиси ҳамда соҳага бегона бўлган фуқаро томонидан, шу куни кеч соат 19:50 ларда йўналишда ҳаракатланиш давомида автобус салонининг чироқларини ўчирган ҳолда йўловчилардан йўл ҳақи учун нақд пул талаб қилганлиги ҳолати ҳақида пост жойлаштирилган.

Мазкур ҳолат юзасидан “Тошшаҳартрансхизмат” АЖ қуйидагиларни маълум қилди:

Постда келтирилган ҳолат 2025 йилнинг 14 март куни, “Тошшаҳартрансхизмат” АЖнинг “2-Автобус саройи” филиали масъул ходимлари томонидан автобус салонига ўрнатилган видеокузатув мосламалари текширилганда юқорида келтирилган ҳолат ҳақиқатда содир бўлганлиги маълум бўлган.

Шу куни ҳолат юзасидан “2-Автобус саройи” филиали директори Ж.Л.Маннопов, филиал масъул ходимлари, филиал тасарруфидаги йўналиш ҳайдовчилари ҳамда 72-сонли йўналиш ҳайдовчиси Ж.Х. билан биргаликда тезкор танқидий йиғилиш ўтказилиб, йиғилишда ҳайдовчи Ж.Х.нинг содир этган қоидабузарлиги муҳокама қилинган ва корхона ички тартиб интизомини ўта қўпол равишда бузганлиги учун ҳайдовчи Ж.Х. билан тузилган меҳнат шартномаси бекор қилинган.

Шунингдек, мазкур ҳолат бўйича ҳайдовчи Ж.Х.нинг содир этган қоидабузарлигига ҳуқуқий баҳо олиш мақсадида, ҳужжатлар тўплами ҳуқуқ-тартибот органларига тақдим этилган.

“Тошкент шаҳар ҳокимининг 2024 йил 13 декабрь кунидаги “Тошкент шаҳридаги жамоат транспорти тизимида йўлкира ҳақини тўлашда электрон тўлов тизимидан фойдаланишни рағбатлантирувчи тарифларни жорий этиш тўғрисидаги” 918-14-0-Қ/24-сонли қарорига асосан, 2025 йил 1 январдан бошлаб Тошкент шаҳар автобуслари салонида нақд пул қабул қилиш амалиёти тўхтатилган. Автобусдан фойдаланганда йўл ҳақини электрон тўлов турларидан фойдаланган ҳолда амалга оширишингиз мумкин!”, – дейилади “Тошшаҳартрансхизмат” АЖ ахборот хизмати хабарида.

• Автобус
• Ҳайдовчи
• Тошкент
• Тошшаҳартранс
• yo‘lovchi