Тошкентда икки аёл ва бир эркак пичоқ ва қайчи билан қуролланиб, босқинчилик содир этишди. Бу ҳақда Ўзбекистон Республикаси ИИВ ҳузуридаги Тергов департаменти матбуот хизмати хабар берди.

Қайд этилишича, 2023 йилнинг 30 июнь куни тахминан соат 13:50 да 3 нафар номаълум шахс Тошкент шаҳар Яккасарой тумани Дилбулоқ маҳалласида жойлашган хонадонларнинг бирига келиб, у ерда вақтинча ижарада яшаб келаётган 61 ёшли Жанубий Корея фуқароси Н.Х. ва унинг қизи 37 ёшли К.М.лар хонадон эшигини очишган вақтда қўлларида бўлган ошхона пичоғи ва қайчи билан таҳдид қилиб, хонадонда бўлган 3 дона уяли телефон аппарати, 1 дона планшет, 1 дона ноутбук, 1.700 АҚШ доллари ва 1.500.000 сўм пул маблағларини эгаллаб, ҳодиса бўлган жойидан яширинишган.

Ушбу ҳолатдан сўнг, К.М. қонунбузарларни таъқиб қилиб, кўчада ёрдам сўраганлиги сабабли, мазкур ҳудудда хизмат олиб бораётган Миллий гвардия ходимлари томонидан босқинчининг бири ушланган.

Олиб борилган тергов-тезкор ҳаракатлар натижасида мазкур жиноятни Тошкент вилоятида яшовчи муқаддам судланган 39 ёшли Д.А., унинг бирга яшовчи турмуш ўртоғи 22 ёшли Л.А. ва Тошкент шаҳар Янгиҳаёт туманида яшовчи муқаддам судланган 29 ёшли А.Р.лар (аёл) содир этганликлари аниқланиб, ашёвий далиллар билан ушланган.

Мазкур ҳолат юзасидан Яккасарой тумани ИИО ФМБ ҳузуридаги Тергов бўлими томонидан Д.А., Л.А. ва А.Р.ларга нисбатан Ўзбекистон Республикаси Жиноят кодекснинг 164-моддаси 3-қисми “в” банди (босқинчилик) билан жиноят иши қўзғатилиб, гумон қилинувчиларга нисбатан “қамоққа олиш” тарзидаги эҳтиёт чораси қўлланилган.

Ҳозирда, тергов давом этмоқда, ушбу шахснинг бошқа жиноятларга алоқадорлиги текширилмоқда.

• Босқинчилик