Тошкент транспорт тизимига ғилдиракли трамвайлар интеграциялашуви таклиф этилди. Бу Бу ҳақда пойтахт ҳокимлиги матбуот хизмати хабар берди.

Маълум қилинишича, йўл-транспорт инфратузилмаси ва атмосфера ифлосланишига доир масалаларнинг долзарблиги, ушбу мавзуларда кўплаб аҳоли мурожаатлари ва муҳокамалари мавжудлигидан келиб чиққан ҳолда, Тошкент шаҳар ҳокимлигида йўл-транспорт инфратузилмасини такомиллаштиришга қаратилган учрашув бўлиб ўтди.

Унда “Toshkent Invest” АЖ, Глобал экологик фонд (ГЕФ), Хитойнинг CRRC Group компанияси, БМТ ТД ва Транспорт вазирлиги вакиллари иштирок этди. Йиғилишда жамоат транспортини такомиллаштириш, яшил ёнилғида ҳаракатланадиган транспорт воситалари улушини ошириш, микромобилликни кенгайтириш, йўловчилар ва ҳайдовчилар учун қулайлик яратиш масалалари муҳокама қилинди.

Хусусан, тадбир давомида “Тошкент шаҳрида кам углеродли транспортга инвестицияларни жалб қилишни жадаллаштириш” лойиҳаси тақдим этилди. Лойиҳа ГЕФ ва БМТ Тараққиёт дастури кўмагида ишлаб чиқилган бўлиб, пойтахтнинг энг гавжум кўчаларидан бири Шота Руставели кўчаси бўйлаб яшил транспорт йўлагини яратишни синов тариқасида таклиф қилмоқда.

Шунингдек, CRRC Group компанияси вакиллари ишлаб чиқарилаётган транспорт воситалари ҳақида батафсил маълумот берди. Хусусан, ғилдиракли трамвайларнинг афзалликлари, қулайлиги, самарадорлиги ва сиғими ҳақида сўз юритилиб, уларнинг пойтахт транспорт тизимига интеграциялашуви таклиф этилди.

Учрашув якунида томонлар келгусида энг самарали ечимларга эришиш учун ҳамкорликда ишлаш ва мунозараларни давом эттиришга келишди.

• Ҳокимлик
• Тошкент
• Трамвай
• Yo'llar