Маълумотларга кўра, Анқарада ички ишлар вазирлиги биноси олдида рўй берган портлашдан бир неча соат вақт ўтиб Туркия Ироқ шимолидаги курдларнинг позициялари бўйлаб авиазарбалар берган. Туркия ҳукуматига кўра, авиазарбалардан сўнг Курдистон ишчилар партиясининг 20 та объекти йўқ қилинган.

Туркия қуролли кучлари Ироқ шимолидаги Курдистон ишчилар партияси (КИП) объектларига ҳаводан зарбалар берди. Бу ҳақда Туркия мудофаа вазирлиги 1 октябрь куни кечқурун эълон қилинган баёнотда айтилади.

Вазирликка кўра, зарбалардан мақсад “KIP ва бошқа террорчи унсурларни зарарсизлантириш, Шимолий Ироқдан Туркия аҳолиси ва ҳуқуқ-тартибот органларига қарши қаратилган террорчилик ҳужумлари амалга оширилишининг олдини олиш, чегара хавфсизлигини таъминлаш” бўлган.

“KIP томонидан фойдаланилган ғорлар, бункерлар, бошпана ва омборлардан иборат жами 20 та объект йўқ қилинди. Ҳужумлар давомида кўп сонли террорчилар зарарсизлантирилди”, — дейилади мудофаа вазирлиги хабарида.

Амалиёт давомида тинч аҳоли, тарихий-маданий бойликлар ва атроф-муҳитга зарар етказмаслик учун барча эҳтиёт чоралари кўрилгани қайд этилган. Туркия қуролли кучлари “мамлакат ва халқнинг омон қолиши ва хавфсизлиги учун” терроризмга қарши курашни давом эттириши таъкидланган.

Шу куни Ироқнинг Туркия ва Эрон билан чегарасига яқин жойлашган Сидакан шаҳри мери AFP агентлигига Брадост ҳудуди ва Бадран қишлоғи бомбардимон қилинганини айтди.

Курдларнинг Rudаw ахборот агентлиги зарбалар Ироқ шимолида, Эрон билан чегарадаги Қандил тоғ тизмаси бўйлаб бoрилганини тасдиқлади. Ҳаракатланиш қийин бўлган Қандил тоғлари анчадан буён KIPнинг таянч базаларидан бири ҳисобланади.

• Eron
• Iroq
• Туркия