Финляндия полицияси яқинда Швеция ва Данияда ташкил этилган Қуръон нусхасини оммавий равишда ёқиш мамлакатда бўлиши мумкин эмаслигини айтди. Бу ҳақда 30 январь куни Финляндия ОАВлари хабар берди.

Маълумотларга кўра, Финляндия миллий полиция департаменти муқаддас китобларни ёқиш “жиноят” деб ҳисобланишини таъкидлаган.

Ҳуқуқ-тартибот идораларининг қайд этишича, бундай ҳодиса динлараро тинчлик мезонларини бузади. Бунинг учун Финляндияда жазо мавжуд. Диний жамоалардан бирининг муқаддас китобини ёқиш эса ана шу мезонга тўғри келади.

“Агар кимдир омма олдида бундай ҳаракатлар содир этса, полиция содир бўлаётган воқеаларга аралашишга мажбур бўлади”, — деган департамент вакили Веса Пихажоки.

Вазирлик Финляндияда конфессиялараро тинчлик бузилишига олиб келиши мумкин бўлган ҳаракатлар қонун билан тақиқланганини эслатди.

Туркия президентининг матбуот котиби ва бош маслаҳатчиси Иброҳим Калин Туркия Финляндияда Қуръон ёқиш тақиқланганини олқишлашини маълум қилди.

Финляндиянинг Йле телеканали томонидан 2021 йилда ўтказилган сўров шуни кўрсатдики, Финляндия депутатларининг аксарияти диннинг муқаддаслиги тўғрисидаги Финляндия қонунини ўзгартиришни истамайди, унда куфр учун олти ойлик қамоқ жазоси берилиши мумкин.

Бироқ, айрим депутатлар сўз эркинлиги билан боғлиқ муаммолардан келиб чиқиб, қонунга ўзгартириш киритишни талаб қилган. БМТнинг инсон ҳуқуқлари қўмитаси эса Финляндияни жазо қоидасини ўзгартиришга чақирган. Уларнинг фикрича бу сўз эркинлигини чеклайди.

• Finlandiya
• Туркия