Аввалроқ, Bombardier CRJ700 лайнери қўниш чоғида вертолёт билан тўқнашиб, дарёга қулаб тушгани ҳақида хабар берган эдик. Фожиа 29 январь маҳаллий вақт билан соат 21:00 да содир бўлган. Самолёт бортида 60 нафар йўловчи ва тўрт нафар экипаж аъзоси бўлиб, у Канзасдан учиб келаётган бўлган. Ҳозирда, Вашингтон яқинидаги Роналд Рейган миллий аэропортида барча рейслар вақтинча тўхтатилиб, қутқарув операцияси бошланган.

Reuters агентлигига кўра, вертолёт машғулот парвозини бажараётган бўлиб, унинг бортида уч нафар ҳарбий бўлган. Улар ҳақида ҳозирча маълумот берилмаган.

Федерал фуқаро авиацияси бошқармаси маълумотларига кўра, қулашдан олдин қўнишга тайёргарлик кўраётган самолёт диспетчерлардан учиш-қўниш йўлагини ўзгартиришга рухсат сўраган. Диспетчерлар бу сўровни тасдиқлаган ва вертолёт билан боғланиб, йўл бўшатишни сўраган. Бироқ, орадан бир дақиқадан камроқ вақт ўтиб, тўқнашув юз берган.

Қўшма Штатлар оммавий ахборот воситаларига кўра, қутқарувчилар ҳали тирик қолганларни топа олишмаган. Қидирув ишлари давом эттирилаётгани айтилмоқда.

• АҚШ
• Авиаҳалокат
• Inson
• Қурбон