Кеча, 24 сентябрь куни Ўзбекистон Республикаси Ташқи ишлар вазири Владимир Норов БМТ Бош Ассамблеясининг 77-сессияси умумий мунозараларида нутқ сўзлади. Бу ҳақда вазирлик ахборот хизмати хабар берди.

Қайд этилишича, Ўзбекистон делегацияси раҳбари ўз нутқида БМТнинг глобал ва минтақавий муаммоларни ҳал қилишдаги марказий ролини кучайтириш муҳимлигини таъкидлади. Шу билан бирга, Ташкилотнинг ўзи ҳам содир бўлаётган ўзгаришларга самарали жавоб бериш учун ривожланиши кераклигини айтиб ўтди.

“Ҳеч бир мамлакат глобал хавф ва қийинчиликлардан қочиб қутула олмайди ёки уларни ёлғиз ўзи ҳал қила олмайди. Инқирозларнинг хавфли спиралидан чиқиш барча мамлакатлар манфаатларини ҳисобга олиш ва ҳурмат қилишга асосланган конструктив мулоқот ва кўп томонлама ҳамкорликда кўринади. Дунё янада барқарор, башорат қилинадиган ва гуллаб-яшнаши учун самарали халқаро ҳамкорлик зарур”, – деди Владимир Норов.

Маданиятлараро мулоқотни ўрнатиш, барча муаммоларга изчил ёндашувлар ва ечимларни излаш, глобал кескинлик, ноаниқлик ва олдиндан айтиб бўлмайдиган таҳдидларни бартараф этиш бўйича ҳамкорлик бугун заруриятга айланиб бораётгани қайд этилди.

Ташқи ишлар вазири сўнгги йилларда Ўзбекистонда амалга оширилаётган демократик ислоҳотларга ҳам тўхталиб ўтган. Хусусан, 2022-2026 йилларга мўлжалланган Янги Ўзбекистон Тараққиёт стратегиясининг амалга оширилиш жараёни ҳақида маълумот берган.

Норовга кўра 2030 йилга келиб, Ўзбекистон камбағаллик даражасини икки баравар камайтириш, барча муҳтожларни қамраб олган ҳолда ижтимоий ҳимоя тизими самарадорлигини ошириш, озиқ-овқат хавфсизлигини мустаҳкамлаш, аҳоли даромади ўртача кўрсаткичдан юқори бўлган мамлакатлар қаторига киришни режалаштирмоқда.

Шунингдек, Владимир Норов Ўзбекистон муҳим сиёсий тадбир – Конституциявий ислоҳотлар арафасида турганини алоҳида таъкидлади ва мазкур жараёнларнинг асосий маъно-мазмунида “Инсон шаъни ва қадр-қиммати учун” тамойили акс этгани айтиб ўтди.

“Конституцияга давлат органлари фаолиятида очиқлик, ошкоралик ва ҳисобдорликни таъминлайдиган нормаларни киритиш таклиф қилинди. Асосий қонунга киритилган ўзгартириш ва қўшимчалар халқ муҳокамасида кўриб чиқилади ва референдумга қўйилади”, – деди Ташқи ишлар вазири БМТнинг 77-сессиясида.

Бундан ташқари, 2023 йил Ўзбекистон Марказий ва Жанубий Осиё мамлакатлари ёшлар Кенгашининг биринчи йиғилишини ўтказишни режалаштираётгани маълум қилинди. Норов мазкур тадбир янги ғоялар ва аниқ таклифлар учун майдон бўлишига ишончи комил эканини таъкидлади.

“Халқаро ҳамжамиятнинг таълим тизимларини эрта тиклаш ва модернизация қилиш бўйича саъй-ҳаракатларни бирлаштиришга содиқлигини намойиш этган таълимни ўзгартириш бўйича тарихий Саммит арафасида муваффақиятли ўтказганини юқори баҳолаймиз.

Ўзбекистонда ушбу соҳада аниқ натижаларга эришилди. сўнгги беш йил ичида ёшларнинг олий маълумот олиш даражаси 9 фоиздан 29 фоизгача, болаларни мактабгача таълим билан қамраб олиш эса эса 27 фоиздан 67,2 фоизгача ўсди.

БМТга аъзо давлатларнинг таълим вазирлари жорий йилнинг 14-16 ноябр кунлари Тошкент шаҳрида UNESCO билан ҳамкорликда ўтказиладиган Болаларни тарбиялаш ва ўқитиш бўйича Бутунжаҳон конференсиясига таклиф қилинди. Ушбу анжуман умуминсоний, адолатли ва сифатли таълимни таъминлаш учун илғор тажрибаларни алмашишга хизмат қилади”, – деди Владимир Норов.

• БМТ
• Tashqi ishlar vazirligi