Ўзбекистон Республикаси Ташқи ишлар вазири Владимир Норов Нью-Йорк шаҳрида Бирлашган Миллатлар Ташкилотининг Тамаддунлар иттифоқи бўйича юқори вакили Мигел Анхел Моратинос билан учрашув ўтказди.

Тамаддунлар иттифоқи 2005 йили турли маданият ва динларга мансуб мамлакатлар ва халқлар ўртасидаги ўзаро англашув ва ҳамкорлик муносабатларини мустаҳкамлаш, шунингдек, жамиятнинг қутбланишини ва экстремистик кайфиятларни кескинлаштирадиган кучларга қарши курашишда ёрдам бериш мақсадида ташкил этилган халқаро ташкилотдир.

Владимир Норов Ўзбекистон Тамаддунлар иттифоқи фаолияти ва ушбу тузилма билан ҳамкорликка муҳим аҳамият бериб, унинг мақсад ва вазифаларини қўллаб-қувватлашини маълум қилди.

Моратинос эътиборига мамлакатимизда ҳаётнинг барча соҳаларида амалга оширилаётган кенг кўламли ислоҳотлар тўғрисида маълумотлар ҳавола этилди.

Анхел Моратинос бугунги кунда Ўзбекистон заминида 130 дан ортиқ миллат ва элат вакиллари тинчлик ва тотувлик муҳитида яшаб, 137 та миллий маданият марказлари ва 16 та мазҳабдаги диний ташкилотлар фаолият юритаётганини юксак баҳолади. Ўзбекистон фуқароларининг миллати, тили ва динидан қатъи назар, тенглиги конституциявий даражада мустаҳкамлангани эътироф этилди. Уларга ўз этник маданияти, урф-одат ва анъаналарини асраш ва ҳар томонлама ривожлантириш, диний маросимларни амалга оширишлари учун қулай шароитлар яратилгани таъкидланди.

Қайд этилганидек, 2018 йили БМТ Бош Ассамблеясининг “Маърифат ва диний бағрикенглик” махсус резолюцияси бир овоздан маъқуллангани Ўзбекистон Республикаси Президенти Шавкат Мирзиёевнинг мамлакатда динлараро мулоқотни рағбатлантириш ва мустаҳкамлаш соҳасидаги сиёсати халқаро ҳамжамият томонидан тўла қўллаб-қувватланаётганидан далолат беради.

• АҚШ
• БМТ
• Nyu-York
• Владимир Норов