Бугун, 2 август куни Ўзбекистон Республикаси ташқи ишлар вазири в.б. Владимир Норов “Ўзбекистон-Озарбайжон-Туркия” мулоқот форматининг биринчи йиғилишида иштирок этиш учун Тошкентга келган Туркия Республикаси ташқи ишлар вазири Мевлут Чавушоғлу билан учрашди. Бу ҳақда ТИВ маътбуот хизмати хабар берди.

Қайд этилишича, икки томон учрашув давомида ўзаро савдо ҳажмини ошириш, иқтисодиётнинг турли тармоқларида инвестиция лойиҳаларини амалга ошириш, маданий-гуманитар ва туризм алмашинувларини кенгайтириш юзасидан олий даражада эрилишилган келишувлар ижросини муҳокама қилишган.

“Ўзбекистон-Туркия муносабатлари икки мамлакат раҳбарларининг қатъияти ва ишончли мулоқоти туфайли юксак ўсиш суръатини намоён этиб, янги амалий мазмун билан бойиб бормоқда”,– дейилади ТИВ хабарида.

Шунингдек, учрашувда Ўзбекистон ва Туркиянинг халқаро институтлар доирасидаги ҳамкорликни ривожлантиришдан манфаатдорлиги таъкидланди.

Дунёдаги ва минтадаги вазият юзасидан фикр алмашилган. Туркия делегацияси Тошкент шаҳрида Афғонистон бўйича бўлиб ўтган конференсия натижаларини юқори баҳолаган. Афғонистон йўналишидаги саъй-ҳаракатларни мувофиқлаштиришни давом эттириш ва бу мамлакатга гуманитар ёрдам кўрсатишга икки томон ҳам тайёрлиги эътироф этилган.

“М.Чавушоғлу Тошкент шаҳрида ташқи сиёсат, савдо, иқтисодиёт ва транспорт масалалари учун масъул бўлган вазирликлар раҳбарлари иштирокида “Ўзбекистон – Озарбайжон – Туркия” мулоқотининг биринчи йиғилишини ўтказиш муҳим аҳамкятга эгалигини таъкидлади”,– дейилади хабарда.

Қолаверса, ТИВ раҳбарлари икки ва кўп томонлама даражада режалаштирилган тадбирлар, шу жумладан, Самарқанддаги Туркий давлатлар ташкилоти саммитига тайёргарликнинг ташкилий жиҳатлари кўриб чиқишган.

• Mevlut Chavushog‘lu
• Ўзбекистон
• Туркия
• Владимир Норов
• uchrashuv