Тошкентдан Сурхондарёга ўзи йўловчиси бўлиб келган Cobalt русумли автомашинани олиб қочган бола ушланди. У ЙПХ ходимини ҳам судраб кетган. Бу ҳақда вилоят ИИБ хабар берди.

Қайд этилишича, жорий йилнинг 7 май куни соат 22:18 ларда ички ишлар бўлимига вазият юзасидан хабар билдирилган. Мазкур ҳолат ўрганилиб, йўловчини вилоят миқёсида тўсиб ушлаш режалаштирилган.

Маълум қилинишича, машинани олиб қочган шахс Жарқўрғон туманига етганида ички ишлар ходимларининг тўхташ ишорасига бўйсунмай қочган. Уни тўсиш учун қўйилган дарвозани ҳам уриб юборган.

Шундай бўлса-да, ўша куни соат 23:40 ларда ходимлар Cоbalt ни ушлашга муваффақ бўлган.

“Қарзим бор эди шу сабабли олиб қочдим. Тотализатордан 2 минг доллар қарзга ботган эдим. Машинани бериб пул олиб турмоқчи эдим. Қилган ишимдан пушаймонман. Ҳаром ўйинлар ўйнаманглар, охирини мана кўриб турибсизлар”, дейди бола.

Ҳозирда мазкур ҳолат бўйича жиноят иши қўзғатилган.

• Сурхондарё
• ЙПХ