Ўзбекистон ва Хитой ўртасида ўзаро визадан озод қилиш тўғрисидаги ҳукуматлараро Битим кучга кириши учун давлат ички процедуралари тугалланди. Бу ҳақда Ташқи ишлар вазирлиги матбуот хизмати хабар берди.

Қайд этилишича, халқаро шартноманинг қоидаларига кўра, ушбу Битим 2025 йил 1 июндан бошлаб кучга киради. Бунда Битим Ўзбекистон ва Хитой фуқаролари учун икки давлат ҳудудига ўзаро визасиз сафарларга имконият яратади.

Битимда таъкидланишича, Томонлар давлатлари фуқаролари икки давлат ҳудудларига кириш, ундан чиқиш ёки транзит қилиш учун ҳар бир алоҳида бўлиш муддати 30 кундан ошмайдиган ва ҳар қандай 180 кунлик давр ичида жами 90 кундан ортиқ бўлмаган вақт мобайнида виза талабларидан озод қилинади.

Бунда Томонларнинг давлатлари ҳудудига ҳар бир кириш ва бўлиш муддати 30 кундан ошмаслиги лозим.

Фуқаролар 30 кундан кўп вақт қолишлари керак бўлса, улар кириш визасини олдиндан олишлари лозим.

Билдирилишича, кўрсатилган Битим ХХРнинг Гонгконг ва Макао махсус маъмурий ҳудудларига ташриф буюришга нисбатан амал қилмайди.

Қўшимчасига, визасиз режим меҳнат фаолияти, ўқиш ва медиа фаолияти билан шуғулланиш, бошқа Томон ваколатли органларининг олдиндан розилигини талаб қиладиган бошқа турдаги фаолият билан шуғулланишига нисбатан қайд этилмайди, дейилади хабарда.

• Ўзбекистон
• Виза
• Хитой