2024 йил 17 сентябрь куни Вена шаҳрида (Австрия) Ўзбекистон Республикаси Вазирлар Маҳкамаси ҳузуридаги Атом энергияси агентлиги директори Азим Ахмедхаджаев ва ХАЭА Бош директори Рафаэл Гросси ўртасида учрашув бўлиб ўтди. Бу ҳақда “Ўзатом” агентлиги хабар берди.

Учрашувда Ўзбекистон Республикасида атом энергетикасини ривожлантиришнинг  муҳим жиҳатлари, жумладан, “Ўзатом” агентлигини қайта ташкил этиш ва кам қувватли атом электр станциясини (КҚАЭС) қуриш лойиҳаси муҳокама қилинди.

Лойиҳа бўйича дастлабки ишлар “Росатом” давлат корпорацияси билан ҳамкорликда ва ХАЭА тавсияларига тўлиқ амал қилган ҳолда бошланган. Лойиҳанинг халқаро хавфсизлик стандартларига мувофиқлигини таъминлаш уч томонлама қўллаб-қувватлаш орқали тасдиқланди.

Бундан ташқари, ХАЭА билан биргаликда ядро технологиялари, жумладан кичик модулли реакторларга бағишланган қўшма тадбирлар ўтказиш режалари кўриб чиқилди, бу технологияларнинг халқаро аҳамиятини намойиш этиши билан бир қаторда бошқа давлатлар қизиқишини ҳам уйғотади.

Учрашувларни муваффақиятли ўтказиш ва икки томонлама ҳамкорликни мустаҳкамлаш мақсадида ХАЭА Бош директорининг Ўзбекистон Республикасига ташрифига фаол тайёргарлик кўрилмоқда.

Қайд этилишича, ХАЭА ва Ўзбекистон Республикаси халқаро стандартлар ва илғор тажрибаларга қатъий амал қилган ҳолда атом энергетикасини ривожлантириш ва лойиҳаларни амалга ошириш бўйича ҳамкорликни давом эттиради.

• O'zAtom