Энергетика объектларида хавфсизлик техникаси қоидалари талабларига риоя қилмасдан ишларни нотўғри ташкил этган 35 та бригаданинг иш фаолияти тўхтатилди. Бу ҳақда Электр энергияси, нефть маҳсулотлари ва газдан фойдаланишни назорат қилиш инспекцияси маълум қилди.

Келтирилишича, хавфсизлик техникаси қоидалари талабларига риоя этиш, бахтсиз ҳодисаларни олдини олиш, меҳнат интизомига риоя қилган ҳолда ишларни тўғри ташкил қилиш ҳамда иш жойларини тўғри тайёрлаш ва хавфли ишлаб чиқариш вазиятларини олдини олишни тартибга солиш мақсадида “Ўзенергоинспексия” томонидан энергетика объектларида ўрганишлар олиб борилган.

Хусусан, жорий йилда 210 та корхона фаолиятида 1 минг 118 та қоидабузилиш ҳолати аниқланган. Шунингдек, ушбу аниқланган қоидабузилишлар юзасидан 407 та кўрсатма берилиб, 380 та соҳа ходимига нисбатан интизомий жазо чоралари кўрилган.

Ўрганишлар давомида хавфсизлик техникаси қоидалари талабларига ҳамда меҳнат интизомига риоя қилмаган ҳолда ишларни нотўғри ташкил этган 35 та бригаданинг иш фаолияти тўхтатилган.

• Энергетика_вазирлиги