Ўзбекистон Республикаси Вазирлар Маҳкамаси ҳузуридаги атом энергияси агентлиги директори Азим Аҳмадхажаев бошчилигидаги делегация 22 апрель куни Хитой Халқ Республикасига ишчи ташрифини бошлади.

Сафар 25 апрелга қадар давом этади ва атом энергетикаси соҳасида халқаро ҳамкорликни мустаҳкамлашга, шунингдек, Ўзбекистонда атом электр станциясини қуриш лойиҳасини амалга оширишнинг асосий жиҳатларини муҳокама қилишга қаратилган.

Ташрифнинг биринчи кунида Хитой миллий ядро корпорациясининг (CННC) халқаро лойиҳалар учун масъул бўлган офисида Uzatom агентлиги, Росатом давлат корпорацияси ва Хитойнинг Shanghai Electric компанияси вакиллари иштирокида уч томонлама учрашув бўлиб ўтди.

Shanghai Electric компаниясининг турбина ускуналарини ишлаб чиқариш бўйича имкониятларини баҳолаш ва уни Ўзбекистондаги бўлажак АЭСнинг техник талабларига мослаштириш вариантларини муҳокама қилиш музокараларнинг асосий мавзуси бўлди. Музокаралар давомида томонлар АЭСнинг ядровий бўлмаган ороли учун жиҳозларни ишлаб чиқиш, ишлаб чиқариш ва етказиб бериш билан боғлиқ масалаларни муҳокама қилдилар.  Зарур технологик ускуналарнинг техник хусусиятлари ва параметрларига алоҳида эътибор қаратилди.

Хитой томони “Узатом”, “Росатом” агентлиги ва CNNC ўртасида Хитой корпорациясининг лойиҳани амалга оширишдаги ролини аниқ белгилаб берадиган уч томонлама келишувни тайёрлаш таклифи билан чиқди. Бундай ҳужжатни имзолаш лойиҳани янада ривожлантириш йўлидаги муҳим қадам бўлади.

• АЭС
• Ўзбекистон
• Хитой