Жиззах вилоятининг Фориш туманида қуввати 500 МВт бўлган қуёш фотоэлектр станцияси ҳамда ҳаво электр узатиш тармоғи қурилади. Бу ҳақда президент қарори имзоланган.

Ҳужжатга кўра, аҳоли ва иқтисодиёт тармоқларини энергия ресурслари билан барқарор таъминлаш, электр энергияси ишлаб чиқаришда табиий газдан фойдаланишни камайтириш ҳамда қайта тикланувчи энергия манбаларидан фойдаланиш кўламини кенгайтириш мақсад қилинган.

Лойиҳани амалга ошириш учун Хитойнинг China Electrical Equepment International Co. LTD ҳамда China Huadison Overseas Co. LTD компаниялари томонидан Huardian Jizzakh Solar Power МЧЖ (лойиҳа компанияси) таъсис этилган.

Инвесторлар ва лойиҳа компанияси Жиззах вилоятида 2,08 миллиард Хитой юани миқдорида тўғридан-тўғри инвестиция жалб этган ҳолда қуввати 500 МВт бўлган қуёш фотоэлектр станциясини лойиҳалаштириши, молиялаштириши, қуриши ҳамда эксплуатация қилиши лозим. “Ўзенергосотиш” АЖ 25 йил давомида электр энергиясини кафолатланган тарзда харид қилади.

Лойиҳани амалга ошириш учун Жиззах вилоятининг Фориш туманидан жами 991,1 гектар яйлов ер участкаси ажратилади ва қишлоқ хўжалигига мўлжалланган ерлар тоифасидан саноат, транспорт, алоқа, мудофаа ва бошқа мақсадларга мўлжалланган ерлар тоифасига ўтказилади.

2025 йилнинг апрелида биринчи Самарқанд халқаро иқлим форуми доирасида Инвестициялар, саноат ва савдо вазирлиги томонидан Ўзбекистонда “яшил иқтисодиёт”ни ривожлантиришга қаратилган қатор ҳужжатлар имзоланганди. Жумладан, Хитойнинг Liquip International компанияси Жиззах вилоятининг Фориш туманида 500 МВт қувватга эга қуёш электр станциясини қуриш бўйича инвестиция битими қабул қилинганди.

Шавкат Мирзиёев 2024 йилнинг февралида бўлиб ўтган йиғилишда энергетика вазири ва вилоятлар ҳокимларининг муқобил энергетика соҳасидаги режаларидан норози бўлиб, икки-уч ой ичида 14 та қуёш ва шамол электр станцияларини ишга тушириш, шунингдек, иккита насосли сақлаш станцияси лойиҳаларини бошлашга топшириқ берган эди. Президент “яшил энергетика ҳам иқтисодиётимиз драйверларидан бирига, ҳам чинакам умуммиллий ҳаракатга айланди”, – деб айтганди.

Ўзбекистонда аҳолининг энергия манбаларига талабини қондириш мақсадида ҳар йили кўплаб лойиҳалар амалга оширилмоқда. Бу ишлар натижасида охирги 5 йилда электр энергияси ишлаб чиқариш 30 фоиз кўпайиб, 81,5 миллиард киловатт соатга етди. 2025 йилда қуввати 65 мВт бўлган 1 185 та микрогес барпо этилиши режалаштирилган.

• Elektr stansiya
• Хитой
• kompaniya
• qurilish