Жорий йилнинг 26-29 апрель кунлари Хоразмда I Халқаро “Лазги” рақс фестивали бўлиб ўтди. Фестивалга 30дан ошиқ давлатлардан 200га яқин санъаткорлар ташриф буюришган.

Мазкур тадбир ҳамда унинг доирасида халқаро илмий-амалий конференцияни ўтказиш Президентнинг 2020 йил 29 сентябрдаги қарорига биноан ташкил қилиниб, 2022 йилдан бошлаб ҳар икки йилда бир маротаба 25-30 апрель кунлари Хива шаҳрида ташкиллаштирилиши белгилаб қўйилган.

Xabardor.uz ушбу фестивалнинг республика бюджетига қанчага тушгани билан қизиқди.

Юқоридаги Президент қарорига мувофиқ, тадбирни ўтказишда молиявий харажатларнинг 70 фоизи республика бюджетидан Маданият вазирлигига ҳар йили ажратиладиган маблағлар ҳисобига ҳамда қолган 30 фоизи Хоразм вилоятининг маҳаллий бюджети, ҳомийлик хайриялари ҳамда қонун ҳужжатларида тақиқланмаган бошқа манбалар ҳисобига қопланади.

Хўш, вилоят ҳокимлиги ҳиссасига тўғри келаётган улуш қанчани ташкил қилади?

Вилоят ҳокимлигининг 2022 йил 24 апрелдаги қарори билан ҳокимликнинг маҳаллий бюджети қўшимча манбалари ҳисобидан “фестивалга тайёргарлик кўриш ва уни юқори савияда ўтказиш билан боғлиқ харажатларни қоплаш учун” Хоразм вилояти маданият бошқармасига 4 млрд 847,4 млн сўм маблағ ажратилган.

Шунингдек, бир кун ўтиб, яъни 25 апрел куни вилоят ҳокими Ф.Эрманов юқоридаги мақсадлар учун “вилоят маҳаллий бюджетининг 2022 йил 1 январь ҳолатига эркин қолдиғи ҳисобидан” 2 млрд сўм ажратиш ҳақидаги 120-12-0-F/22 сонли қарорни имзолаган.

Президент қарорида ушбу тадбирни молиялаштириш манбалари сифатида санаб ўтилган “ҳомийлик хайриялари ҳамда қонун ҳужжатларида тақиқланмаган бошқа манбалар” ҳақида маълумотлар ҳеч қаерда очиқланмаган ва буни расмийлаштиришнинг ҳам имкони йўқ.

Мазкур қарорда, шунингдек, айрим чиқимлар ҳам саналиб ўтган бўлиб, жумладан:

– Танлов иштирокчиларининг чиқишларини баҳолаш учун тузиладиган халқаро ҳайъат тузилади ва аъзолар қуйидаги тартибда рағбатлантирилади:

а) раисга – 2 минг АҚШ доллари;

б) ҳайъат аъзоларининг ҳар бирига (6 киши) – 1000 (бир минг) АҚШ доллари миқдорида гонорар пули тўлаб берилади.

Шунингдек, анжуман доирасида ўтказиладиган танлов ғолиблари қуйидаги миқдорда пул мукофотлари билан тақдирланади:

“Гран-При” – 7 000 АҚШ доллари;

1-ўрин – қуйидаги номинациялар бўйича:

“Энг яхши яккахон рақс ижрочиси” – 5 000 АҚШ доллари;

“Энг яхши рақс жамоаси” – 5 000 АҚШ доллари;

“Энг яхши саҳналаштирилган рақс” – 5 000 АҚШ доллари.

2-ўрин – қуйидаги номинациялар бўйича:

“Энг яхши яккахон рақс ижрочиси” – 3 000 АҚШ доллари;

“Энг яхши рақс жамоаси” – 3 000 АҚШ доллари;

“Энг яхши саҳналаштирилган рақс” – 3 000 АҚШ доллари.

3-ўрин – қуйидаги номинациялар бўйича:

“Энг яхши яккахон рақс ижрочиси” – 2 000 АҚШ доллари;

“Энг яхши рақс жамоаси” – 2 000 АҚШ доллари;

“Энг яхши саҳналаштирилган рақс” – 2 000 АҚШ доллари.

Бундан ташқари, ташкилотчилар томонидан ҳар бир қўшимча номинация учун 500 АҚШ доллари миқдорида пул мукофотлари ажратилиши мумкин.

Демак, хомаки ҳисоб китобларга кўра, 6 млрд 847,4 млн сўмни вилоят ҳокимлиги ажратиши керак бўлган маблағ (30 фоиз) деб оладиган бўлсак, жами тахминан 22 млрд 825 млн сўм сарфланган бўлади.

Бунда юқорида айтилганидек, ҳомийлик ва қонун билан тақиқланган бошқа маблағларни аниқлаштиришнинг имкони йўқ.

• Давлат бюджети
• фестиваль
• Лазги
• Хоразм
• қизиқарли