Ўрмон хўжалиги балансидаги ер майдонини ижарага олиб бериш учун пул талаб қилган Хоразм вилояти Янгиариқ тумани қишлоқ хўжалиги бўлимининг масъул ходими қўлга тушди. Бу ҳақда ДХХ хабар берди.

Маълум қилинишича, ушбу масъул ходим туман ҳудудида жойлашган ва “Хоразм давлат ўрмон хўжалиги” давлат муассасаси балансида бўлган 29 гектар ер майдонини чорвачилик йўналишида 49 йил муддатга ижара асосида фойдаланиш учун олиб бериш ва мансабдор танишлари орқали кадастр ҳужжатларини расмийлаштириб бериш эвазига фуқародан 4000 АҚШ доллари талаб қилган.

ДХХ ҳамда Иқтисодий жиноятларга қарши курашиш департаменти ҳамкорлигида ўтказилган тезкор тадбирда мазкур шахс 3900 АҚШ доллари ва 1 млн 297 минг сўм пул маблағини олган вақтида ашёвий далиллар билан ушланган.

Ушбу шахсга нисбатан Жиноят кодексининг 168-моддаси (фирибгарлик) 2-қисми “а” банди ва 28,211-моддаси (пора бериш) 1-қисми билан жиноят иши қўзғатилиб, тергов ҳаракатлари олиб борилмоқда.

• ДХХ
• Фирибгарлик
• Жиноят
• Ўрмон хўжалиги