Четга ишлашга кетган фуқароларга ҳам Ўзбекистонда ипотека кредити олиш имконияти берилади. Бу президент Шавкат Мирзиёевнинг фармони билан тасдиқланган “йўл харитаси”да белгиланди.

Унга кўра, чет элда вақтинча меҳнат фаолиятини амалга ошираётган шахслар ва салбий кредит тарихига эга бўлган фуқаролар учун ипотека кредити ва субсидиядан фойдаланиш имкониятини кенгайтириш кўзда тутилган. Бу вазифа Марказий банкка топширилган ва ижро муддати 2025 йил 1 апрель этиб белгиланган.

Иқтисодиёт ва молия вазирлиги ҳам ушбу санагача ипотека кредитини ажратишда банкларнинг хатарларини камайтиришга хизмат қилувчи давлат ипотека кафолатини тақдим этиш механизмини жорий қилиш бўйича Вазирлар Маҳкамасига таклиф киритиши лозим.

Солиқ қўмитаси Иқтисодиёт ва молия вазирлиги билан бирга кўп квартирали уй-жойлардаги янги турар ва нотурар жойларни қурилиш ташкилотларидан тўловни тижорат банки орқали амалга ошириб сотиб олган фуқароларга тўланган қўшилган қиймат солиғи суммасининг бир қисмини кешбек сифатида қайтариш бўйича таклиф ишлаб чиқиш ва Президент администрациясига киритиши белгиланди.

• Ипотека
• Кредит
• Қарор
• migrant