Бу ҳақда Еврокомиссия раиси ўринбосари Дубравка Шуитса маълум қилди.

“Европа Иттифоқи ва халқаро ҳамжамият Сурияни тиклаш учун 5,8 миллиард евро миқдорида молиявий ёрдам ажратади. Ушбу маблағнинг 4,2 миллиард евро қисми грант сифатида берилса, 1,6 миллиард евро кредит шаклида тақдим этилади”, — дея аниқлик киритган у.

Германия эса Сурия аҳолиси ва қўшни мамлакатлардаги суриялик қочқинларни қўллаб-қувватлаш учун 300 миллион евро ажратишини маълум қилди.

БМТ Лойиҳалар хизмати бошқармаси (UNOPS) раҳбари Хорхе Морейра да Силванинг таъкидига кўра, Сурия ҳали ҳамон иқтисодий ва ижтимоий инқирозни бошидан кечирмоқда. Энг муаммоли соҳалар сифатида ичимлик суви таъминоти, транспорт, энергетика, таълим ва соғлиқни сақлаш тизимлари қайд этилган.

БМТ вакиллари Сурияни тиклаш бўйича режалар мамлакатнинг ўзида ишлаб чиқилиши кераклигини таъкидлаб, халқаро ҳамжамиятни Европа Иттифоқи тажрибасидан ўрнак олишга чорлаган.

Аввалроқ ЕИ Башар Асад даврида Дамашққа нисбатан жорий қилинган санкцияларнинг бир қисмини бекор қилган эди.

• Моддий ёрдам
• Suriya
• Yevropa Ittifoqi