Мана икки ярим ойдирки Бойсун аҳолиси заҳарли газдан қийналяпти. Сентябрь ойида бошланган мазкур техноген ҳодисага 2 ярим ойдан ошди. Бу орада ёзаётган ва гапираётган журналистлар ҳам бироз тин олди. Хўш, Бойсунда вазият қандай?

Шу йилнинг 1 сентябрь куни Сурхондарё вилоятининг Бойсун туманида жойлашган “Мустақилликнинг 25 йиллиги” конидаги 604-сонли қудуқда бурғилаш ишларини олиб бориш жараёнида технологик жараённинг бузилиши натижасида водород сульфид гази сизиб чиққани тасдиқланган эди. Орадан 15 кун ўтиб, қудуқ герметиклангани таъкидланди. Шундан сўнг бойсунликларнинг жонига бироз оро кирди. Орадан 2 кун ўтиб айнан ўша қудуқдан яна газ чиқишни бошлади. Мазкур ҳолатдан кейин 4 киши ҳалок бўлгани ва 11 киши жароҳат олиб шифохонага жойлаштирилгани таъкидланганди. Мана 2 ойдан ошиқ вақт давомида конь атрофидаги аҳоли мазкур заҳарли газдан азият чекмоқда. Кимдир кўчиб кетди кимдирлар тақдирига кўниб, соғлигини ўртага қўйиб яшаб келмоқда. Заҳарли газдан асосан хаста қариялар, болалар ва ҳомиладор аёллар қийналмоқда. Улар бугунги кунда коллеж ётоқхоналарига жойлаштирилган. Аҳоли вакиллари ҳали қишга тайёргарлик кўрмаганини ва кўчиб юришлар жуда ҳам қийинлик қилаётганини таъкидлашмоқда.

Мутасаддилар томонидан мазкур муаммо бартараф этилиши ҳақида эса турлича саналар айтилмоқда. Хусусан, 1 ойча олдин Энергетика вазири Жўрабек Мирзамаҳмудов “Лолазор” подcастида қудуқ ҳали ёпилмаганини у ерда мутахассислар ишлаётгани, АҚШнинг техноген ҳолатлар бўйича мутахассисларига эга бўлган 3 та компанияси Озарбайжоннинг Socar компанияларидан ишчи гуруҳлар келганини ва улар ушбу муаммо устида иш олиб бораётганини айтган ва ишчи гуруҳ 2-3 кунда ёпишга ҳаракат қилиб кўради агар ёполмаса кейинги режа билан ишланади ва бу 2-3 ой вақт олади деган эди.

Юқорида таъкидлаганимиздек қудуқдан газ чиқиб бошлаганига 2 ойдан ошди. Аҳоли вакилларининг Газета.узга берган интервьюсида таъкидланишича, ёши катта, юролмайдиганлар қишлоқдан чиқмагани ва ҳалиям газланиб ётибди. Энг ачинарлиси олдинда бутун қиш турибди. Газдан қочган аҳоли вакиллари эса унга умуман тайёргарлик кўрмаган. Мутасаддилар эса мазкур ҳолат бўйича ҳеч қандай тайёргарлик кўрмаяпти шекилли олдиндаги қиш, кондаги ҳолат бўйича ҳеч қандай маълумот берилмаяпти.

Уйини ташлаб Бойсун атрофидаги қишлоқларга вақтинча кўчиб кетган одамларнинг айтишича, одатда қишга тезаклар билан тайёргарлик кўрилади. Аммо улар бу йил уларни ҳам қилишга улгурмаган, уйига борса газланиб қоляпти бормаса кўп ишлари орқага сурилиб кетяпти.

Шу ўринда саволлар туғилади. Кунлар совиб, совуқ қишнинг нафаси сезилиб қолган бир пайтда бошқа уйлардан қўним топган бойсунликлар қишда нима қилади? Уларнинг уйи, моли, қолиб кетаётган даромадли ишлари нима бўлади? Аварияга учраган конь қачон ёпилади? Расмийлардан муносабат ва ижобий томонга ўзгаришларни кутиб қоламиз.

Тайёрлади: Илёс Болтаев

• Бойсун
• Газ
• Сурхондарё