Ayni payda bosh murabbiy borasida bir necha variantlar ustida ish olib borayotgan Angliyaning “Everton” jamoasi “Manchester Yunayted”ning sobiq futbolchisi Ueyn Runidan rad javobini olgach, “Chelsi”ning ham sobiq futbolchisi ham sobiq murabbiyi Frenk Lempard bilan kelishuvga erishadi. Bu haqda insayder-jurnalist Fabrisio Romano maʼlum qildi.

“Derbi Kaunti” bosh murabbiyi Ueyn Runi “Everton”dagi ish taklifini rad etdi.

“Everton” agentimga murojaat qildi va menga suhbat taklif qildi.

Men taklifni rad etdim. Premyer-liga klublaridan biriga murabbiy boʻlishimga ishonaman. Ammo hozircha “Derbi”da ishim bor, bu hozir eng muhimi”, — deya javob bergan Runi.

Shundan soʻng, “Everton” bosh murabbiy etib tayinlash borasida Lempard bilan kelishuvga erishgan.

2019-2021-yillarda “aristokratlar”ni boshqargan 43 yoshli britaniyalik mutaxassis Frenk Lempard “Everton” bosh murabbiyiga aylanadi.

Klub boshqa mutaxassislar – “Portu” va “Fenerbaxche” klublarining sobiq ustozi Vitor Pereyra va amaldagi bosh murabbiy vazifasini bajaruvchi Dunkan Fergyuson bilan muzokaralardan soʻng shunday qarorga kelgan. Natijada tanlov Lempardda toʻxtagan, u bilan shartnoma toʻliq kelishib olingan.

Eslatib oʻtish mumkin, Lempard 2021-yilning yanvar oyidan beri ishsiz. Murabbiylik faoliyatini Chempionshipda “Derbi Kaunti”da boshlagan “Chelsi”ning sobiq futbolchisi 2019-yil oktyabr oyida Premyer-ligada oyning eng yaxshi murabbiyi deb topilgan edi.

Maʼlumot uchun, 16-yanvar kuni “Everton”ni boshqargan Rafael Benites isteʼfoga chiqarilgan edi. U 2021-yilning iyulidan buyon jamoani boshqarib kelayotgan edi.

Oʻtkazilgan 19-turdan soʻng, “Everton” Premyer-liga turnir jadvalida 16-oʻrinni egallab turibdi.

• Futbol
• Xorij