“AQShning Los-Anjeles shahrida bo‘lib o‘tadigan yozgi Olimpiya o‘yinlari rasman 2028-yil 14–30-iyul kunlariga belgilangan, biroq sport turlari bo‘yicha musobaqalar 12-iyuldayoq boshlanadi”, – deb xabar qilmoqda “Dunyo” axborot agentligi.

Xalqaro Olimpiya qo‘mitasi ma’lumotiga ko‘ra, dastlabki ikki kun futbol, regbi-7, chim ustida xokkey, gandbol, suv polosi va kriket bo‘yicha o‘yinlar start oladi.

14-iyul kuni ochilish marosimi bir vaqtda ikki arena – “Los Angeles Memorial Coliseum” va “SoFi Stadium”da bo‘lib o‘tadi.

15-iyul kuni medallar taqsimlana boshlaydi. Birinchi oltin medal triatlonda beriladi. 29-iyul ulkan anjumanning voqealarga eng boy kuni: taxminan 35 sport turida finallar rejalashtirilgan.

30-iyul kuni musobaqaning yopilish marosimi, shuningdek basketbol, gandbol, suv polosi va boshqa jamoaviy sport turlari bo‘yicha hal qiluvchi bahslar tashkil etiladi.

Yozgi Olimpiya o‘yinlari tashkiliy qo‘mitasi to‘liq jadval bilan rasmiy veb-saytda tanishish mumkinligini ma’lum qilgan. Sahifada 32 sport turi, jumladan musobaqa joyi, saralash bosqichi va final kunlari ko‘rsatilgan.

• AQSh
• Los-Anjeles
• Olimpiada