Britaniya rasmiylari Ukrainaning Rossiya bilan tinchlik muzokaralarida jiddiy yon berishlariga qarshi. Bu haqda Britaniyaning The Times gazetasi xabar bermoqda.

“Ba’zi ittifoqchilarimiz (Ukraina prezidenti Vladimir Zelenskiy) Rossiya shartlariga rozi bo‘lishi mumkin”, deydi Britaniya hukumatidagi manba nashrga. Uning so‘zlariga ko‘ra, London Kiyev hudud va sanksiyalar masalasida Moskvaga sezilarli darajada taslim bo‘lishini istamaydi.

Qayd etilishicha, Buyuk Britaniya bosh vaziri Boris Jonson ittifoqchilardan Rossiya Qurolli kuchlari Ukrainani, jumladan, Qrim hududini tark etguniga qadar Rossiyaga qarshi sanksiyalarni kuchaytirishni istaydi. “Bizning fikrimizcha, Ukraina (Rossiya Federatsiyasi bilan) muzokaralar boshlanishidan oldin eng kuchli harbiy pozitsiyani egallashi kerak”, – deya qoʻshimcha qiladi manba. 

Qayd etish joiz, Rossiya prezidenti Vladimir Putin joriy yil 24-fevral kuni Ukraina hududida maxsus operatsiya o‘tkazilishini ma’lum qildi. Har ikki tomon allaqachon bir qator muzokaralar olib borishgan, biroq ularning barchasi muvaffaqiyatsizlikka uchragan. Ukraina tomonidagi muzokara guruhi a’zolari avvalroq har bir qadamni g‘arblik hamkorlari bilan muvofiqlashtirganini tan olgan edi. Ukraina bilan muzokaralarda Rossiya delegatsiyasi rahbari Vladimir Medinskiyning aytishicha, Kiyev NATOga kirishdan bosh tortishga rozi bo‘lgan. Biroq Rossiya Qrim va Donbass bo‘yicha imtiyozlarga rozi bo‘la olmaydi, deya qo‘shimcha qildi u.

Ta’kidlanishicha, Ukraina va Rossiya delegatsiyalari o‘rtasidagi Ukrainadagi urushni tugatish bo‘yicha muzokaralarning navbatdagi raundi bugun, 1-aprel kuni videokonferensiya orqali bo‘lib o‘tadi.

Ma’lumot uchun, 29-mart kuni Istanbulda Rossiya va Ukraina o‘rtasida navbatdagi muzokaralar bo‘lib o‘tdi. Muzokara jarayoni matbuot uchun yopiq eshiklar ortida o‘tkazildi. Rossiya delegatsiyasidan prezident yordamchisi Vladimir Medinskiy ishtirok etdi. Uchrashuvdan so‘ng Istanbulda o‘tkazilgan muzokaralarni samarali deb atadi.  

• Buyuk Britaniya
• Muzokara
• Rossiya
• Ukraina
• Urush