Qo‘shma Shtatlar prezidenti Donald Tramp Osiyo, Afrika va Lotin Amerikasidagi 12 ta davlat fuqarolarining AQShga kirishini taqiqlovchi, shuningdek, yana yetti davlat fuqarolari uchun esa cheklovlar ko‘zda tutilgan farmonni imzoladi.

Oq uy xabariga ko‘ra, Afg‘oniston, Myanma, Chad, Kongo Demokratik Respublikasi, Ekvatorial Gvineya, Eritreya, Gaiti, Eron, Liviya, Somali, Sudan va Yaman davlatlari fuqarolarining Qo‘shma Shtatlarga kirishi taqiqlanadi. Taqiq 9-iyundan kuchga kiradi.

Burundi, Kuba, Laos, Serra-Leone, Togo, Venesuela va Turkmaniston fuqarolarining AQSh hududiga kirishi cheklanadi.

Donald Tramp bunday taqiqni o‘zining birinchi prezidentlik muddati davridayoq joriy qilgan edi. bu 2017-yilda Tramp prezident lavozimini egallaganidan keyingi ilk qarorlaridan biri bo‘lgan.

O‘shanda u Liviya, Suriya, Yaman va Somalidan fuqarolarining AQSh chegarasidan o‘tish huquqini bekor qilgan edi. Keyinchalik ro‘yxatga Shimoliy Koreya, Venesuela va Chad ham qo‘shilgan.

Mazkur taqiq bir necha bor sudlarda ko‘rib chiqilgan, o‘zgartirilgan, biroq oxir-oqibat o‘z kuchini saqlab qolgan, AQSh Oliy sudi uni konstitutsiyaga muvofiq deb topgan.

• AQSh
• Tramp
• taqiq