Samarqand IIB 15 sutka ma’muriy qamoq jazosi tayinlangan fuqaroning shifoxonada vafot etganligi yuzasidan ma’lumot berdi.

Qayd etilishicha, Oqdaryo tumni “Oytamg‘ali” MFYda yashagan fuqaro B.R. Payariq tumani sudining 03.02.2021 yildagi sud buyrug‘iga asosan 2 nafar voyaga yetmagan farzandlari voyaga yetguniga qadar aliment to‘lashi belgilangan bo‘lsa-da, 2021 yil fevral oyidan 2022 yil oktabr oyiga qadar 23.004.990 so‘m miqdorida aliment va moddiy ta’minot pullarini to‘lamasdan kelganligi aniqlangan.

JIB Oqdaryo tuman sudining 25.10.2022 yildagi qarori bilan B.R.ga MJtKning 47-4-moddasi 1-qismi bilan 15 sutka ma’muriy qamoq jazosi tayinlangan.

Fuqaro B.R. ma’muriy tartibda qamoqqa olingan shaxslarni saqlash uchun mo‘ljallangan Maxsus qabulxonaga 25 oktabr kuni olib borilgan.



Maxsus qabulxona ichida fuqaro B.R.ning ruhiy holati yomonlashishi (tutqanog‘i tutib qolgan) natijasida yiqilib, bosh qismi xona ichidagi devor burchagiga urilib, tan jarohati olgan.

U bilan bir xonada saqlanayotganlar, shuningdek maxsus qabulxona xodimlari unga zudlik bilan birinchi tez tibbiy yordam ko‘rsatishib, fuqaro RSHTYOIM Samarqand filialiga olib borilib, unga tibbiy yordam ko‘rsatilgan.

Maxsus qabulxonaga keltirilgandan so‘ng ham fuqaro xona ichida o‘ziga-o‘zi gapirib, ruhiyatida buzilish bo‘lgaligi sababli, Maxsus qabulxona boshlig‘i xatiga asosan viloyat ruhiy kasalliklar shifoxonasiga uning ruhiy holatini tekshirish uchun yuborilgan.

28.10.2022 yil Urgut tumani “Halqobod” mahallasida joylashgan viloyat ruhiy kasalliklar shifoxonasida fuqaro vafot etgan.

Ayni damda holat yuzasidan  prokuratura organlari tomonidan tergovga qadar tekshiruv harakatlari olib borilmoqda.

Hozirda marhumning o‘limi sababiga aniqlik kiritish maqsadida sud-tibbiy ekspertizasi, IIB xodimlari va shifokorlarning harakatlari yuzasidan xizmat tekshiruvlari tayinlangan.

• Aliment
• O'lim
• Samarqand