Bugun, 5-sentabr kuni Xalq ta’limi vazirligi tizimidagi 10 085 ta maktabda 2022/2023-o‘quv yili darslari boshlandi.

Avval xabar berilganidek, joriy o‘quv yilida 702 000 nafar bolalar umumta’lim maktablarining 1-sinfiga qabul qilindi. Ularga 12 turdagi o‘quv qurollari, maktab sumkasi va darsliklar majmuasidan iborat Prezident sovg‘alari topshirildi.

Aytish lozimki, maktablarda tahsil olayotgan 6 469 737 nafar o‘quvchi ishtirokida tashkil etilayotgan “Birinchi qo‘ng‘iroq” tadbirlarida mahalliy hokimliklar hamda keng jamoatchilik vakillari, mahalla faollari, o‘quvchilar va ularning ota-onalari ishtirok etdi.

Mazkur “Birinchi qo‘ng‘iroq” tadbirlari “Yangi O‘zbekistonda el aziz, inson aziz!” shiori ostida tashkil etilib, unda xalq ardog‘idagi insonlar, maktablarning ko‘zga ko‘ringan bitiruvchilari hamda davlat idoralari rahbarlari qatnashdi.

Shuningdek, respublikadagi barcha umumta’lim maktablarida 2022/2023-o‘quv yilining birinchi dars soati – “Mustaqil darslari” o‘tkazildi. Ushbu darslarda istiqlol yillarida erishilgan yutuqlar, yoshlar tomonidan qo‘lga kiritilgan katta g‘alabalar hamda milliy tarixning yorqin lavhalari haqida so‘z yuritildi.

• Maktab
• Xalq ta'limi vazirligi