Rossiya tomonidan yuk mashinalarining Rossiya va Belarus chegarasidan o‘tishi bo‘yicha yangi tartib joriy etildi. Bu haqda Transport vazirligi axborot xizmati xabar berdi.

Qayd etilishicha, 2024-yilning yanvar oyidan boshlab Belarus-Rossiya chegarasidagi “Krasnaya gorka”, “Rudnya”, “Krasniy kamen” nazorat punktlaridan uchinchi davlat fuqarolarining o‘tishi cheklandi. Shuningdek, yangi tartibga muvofiq ikki davlat chegarasidan faqat Rossiya va Belarus fuqarolari erkin o‘tishi (kirish va chiqish) mumkin.

Ushbu tartib avtotransportda xalqaro yuk tashuvlarini amalga oshirayotgan haydovchilarga ham tegishli. Uchinchi davlat (shu jumladan YOIIga a’zo davlatlar) fuqarolari bo‘lgan xalqaro yuk tashuvlari faoliyati bilan shug‘ullanuvchi haydovchilar Rossiya Federatsiyasiga kirishi va mamlakatni faqat xalqaro chegara-nazorat punktlari orqali tark etishi mumkin.

Yangi tartibning joriy etilishi ortidan uchinchi davlat, xususan, O‘zbekiston fuqarolari boshqaruvida bo‘lgan yuk mashinalarining Rossiya-Belarus chegarasida to‘planib qolish holati kuzatildi. Yuzaga kelgan ushbu holat O‘zbekiston va Belarus hamda Rossiya transport vazirliklari rahbariyati darajasida muhokama etildi.

Shuningdek, Transport vazirligi rahbariyati tomonidan ushbu holatda milliy tashuvchilar manfaatlarini inobatga olgan holda Hukumat darajasida yechim topish yuzasidan diplomatik kanallar orqali muzokaralar olib borilmoqda.

• Belarus
• Rossiya
• Transport vazirligi