Boku shahridagi tungi klubda sodir bo‘lgan portlash oqibatida bir kishi halok bo‘ldi, 31 kishi yaralandi. Bu haqda Ozarbayjon Bosh prokuraturasi bayonotida so‘z boradi.

“Portlash yakshanbaga oʻtar kechasi soat 03:00 atrofida Boku shahrining Sabail tumanidagi Tarlan Aliyarbekov koʻchasida joylashgan tungi klubdagi yongʻin natijasida sodir boʻlgan. Dastlabki maʼlumotlarga koʻra, bir kishi halok boʻlgan, 31 kishi turli darajadagi jarohatlar olgan”, – deyiladi xabarda. 

Hozirda voqea joyida prokuratura, Ichki ishlar, Favqulodda vaziyatlar va boshqa tegishli idoralar vakillari surishtiruv ishlarini olib bormoqda. 

“Prokuratura organlarining tergovchi va kriminalistlari tomonidan zarur tergov harakatlari olib borilmoqda”, – deyiladi vazirlik xabarida.

Favqulodda vaziyatlar vazirligi tungi klubdagi yong‘in va portlash yuzasidan olib borilgan qidiruv-qutqaruv ishlari allaqachon yakunlanganini ma’lum qildi.

Respublika Sog‘liqni saqlash vazirligi matbuot xizmati xabariga ko‘ra, 24 nafar fuqaro tibbiy muassasalarga yetkazilgan, ulardan olti nafarining ahvoli og‘ir, deb baholanmoqda. 7 nafar jabrlanuvchiga birinchi tibbiy yordam ko‘rsatilgach, uylariga jo‘natilgan.

Hozirda huquq-tartibot idoralari hodisa sabablarini o‘rganishni davom ettirmoqda. NTV telekanalining xabar berishicha, Ozarbayjon Ichki ishlar vazirligi rasmiy vakili Ehsan Zohidov hodisaga maishiy gaz sizib chiqishi sabab bo‘lishi mumkinligini aytdi.

• FVV
• Jahon
• Ozarboyjon
• portlash