Magistral gaz quvurlarida bosimni rostlash va me’yoriy holatga keltirish ishlari davom etmoqda. Bu haqda Energetika vazirligi axborot xizmati xabar berdi.

Gaz bosimining pastligi sababli, birinchi navbatda aholi xonadonlari hamda ijtimoiy soha obyektlarini tabiiy gaz bilan uzluksiz ta’minlash ustuvor vazifa hisoblanadi. 

Shunga ko‘ra, bugun metan “zapravka”lar ijtimoiy soha obyektlariga xizmat ko‘rsatuvchi va jamoat transporti uchun faoliyat yuritadi.

Mazkur choralar aholi va ijtimoiy soha obyektlarini barqaror gaz ta’minoti bilan ta’minlashga qaratilgan.

Shuningdek, birja savdolariga chiqarilayotgan avtobenzin va suyultirilgan gaz (propan) hajmi oshirilgani, ushbu yoqilg‘i turlari yetarli miqdorda yetkazib berilayotgani bildirildi.

Mutasaddilar xususiy avtomobil yoqilg‘i quyish shoxobchalari egalarini narxlarni sun’iy ravishda oshirmaslikka hamda avtobenzinni sifat va miqdor jihatidan to‘g‘ri sotishga chaqirdi. Vakolatli tashkilotlar tomonidan narxlar ustidan nazorat kuchaytirilgani va asossiz oshirishlarga yo‘l qo‘yilmasligi ta’kidlandi.

• Energetika_vazirligi
• Gaz