Ichki ishlar vazirligi Vazirlar Mahkamasining “Ichki ishlar organlarining kinologiya xizmatlari faoliyatini tubdan takomillashtirish chora-tadbirlari to‘g‘risida”gi qaroriga o‘zgartirish va qo‘shimchalar kiritilishi nazarda tutilgan qaror loyihasini normativ-huquqiy hujjatlar loyihalari muhokamasi portaliga joylashtirdi.

Mazkur nizomga kiritilayotgan o‘zgarishga ko‘ra, endilikda Ichki ishlar organlari kinologiya bo‘linmalari shartnoma asosida jismoniy va yuridik shaxslarga tegishli itlarni tayyorlash, ularning itlarini vaqtinchalik kinologiya bo‘linmalarida saqlash bo‘yicha pullik xizmatlar ko‘rsatish, shuningdek yetishtirilgan va o‘zlarining ehtiyojidan ortiq bo‘lgan hamda xizmatga yaroqsiz itlarni sotish huquqiga ega bo‘ladi.

Shuningdek, jismoniy va yuridik shaxslarga tegishli itlarni tayyorlash, ularning itlarini vaqtinchalik kinologiya bo‘linmalarida saqlash bo‘yicha pullik xizmatlar ko‘rsatish yo‘lga qo‘yiladi.

Ma’lum qilinishicha, xizmatlar ko‘rsatish va xizmat itlarini sotishdan tushadigan pul mablag‘lari to‘liq hajmda Ichki ishlar vazirligi Jamoat xavfsizligi departamenti Jamoat tartibini saqlash xizmatining maxsus hisob varag‘iga yo‘naltiriladi hamda ichki ishlar organlarining kinologiya bo‘linmalari moddiy-texnika bazasini mustahkamlash, shuningdek, xodimlarni moddiy rag‘batlantirish uchun belgilangan tartibda foydalaniladi.

Mazkur qarorning bajarilishini nazorat qilish O‘zbekiston Respublikasi Ichki ishlar vaziri P.R.Bobojonov zimmasiga yuklatiladi.

• Davlat xizmati
• IIV