O‘zbekiston TIV matbuot kotibi Ahror Burxonovning ma’lum qilishicha, Rossiya Qurolli kuchlari bilan shartnoma imzolab, Ukrainaga qarshi urushda qatnashgan 1 ming 110 nafar o‘zbekistonlik fuqaroga oid ma’lumotlar tekshirilmoqda.

Mazkur shaxslar nomi Ukrainadagi “Yashashni istayman” davlat loyihasi tomonidan e’lon qilingan ro‘yxatda keltirilgan edi.

Tashqi ishlar vazirligi vakili: “O‘zbekiston fuqarolarining xorijdagi harbiy harakatlarda ishtiroki qonunchilikda taqiqlangan. Agar bu tasdiqlansa, tegishli choralar ko‘riladi”.

Shuningdek, TIV vakili ayrim fuqarolarda Rossiya fuqaroligi mavjudligi haqidagi xabarlarga javoban O‘zbekistonda ikki fuqarolikka yo‘l qo‘yilmasligini eslatib o‘tgan.

O‘zbekiston qonunchiligida:

– Jinoyat kodeksining 154-moddasiga ko‘ra, yollanish, ya’ni nizolashayotgan davlatning fuqarosi yoki harbiy xizmatchisi hisoblanmagan yoxud nazorat qilinib turgan nizolashayotgan davlat hududida doimiy yashamaydigan yoki hech qanday davlat tomonidan qurolli kuchlar tarkibida rasmiy topshiriqni bajarish vakolati berilmagan shaxsning moddiy manfaatdorlik yoki boshqa biron shaxsiy manfaatni ko‘zlab, o‘zga davlat hududida yoki uning tarafini olib qurolli to‘qnashuvda yoxud harbiy harakatlarda qatnashish uchun yollanishi 5 yildan 10 yilgacha ozodlikdan mahrum qilish bilan jazolanadi.

– Jinoyat kodeksining 154−1-moddasiga ko‘ra, O‘zbekiston fuqarosining chet davlatlarning harbiy xizmatiga, xavfsizlik, politsiya, harbiy adliya organlari yoki shunga o‘xshash boshqa organlariga xizmatga kirishi bazaviy hisoblash miqdorining 300 baravarigacha (112,5 mln so‘m) miqdorda jarima yoki 3 yilgacha axloq tuzatish ishlari, xizmatga yollanishi esa 5 yilgacha ozodlikdan mahrum qilish bilan jazolanadi.

• O‘zbekiston
• Rossiya
• Tashqi ishlar vazirligi
• Ukraina
• Urush
• fuqaro
• tekshiruv