Kecha, 26-oktyabr kuni Erondagi Shoh-Cherak maqbarasi (Sheroz) yaqinida sodir etilgan terakt oqibatida kamida 15 kishi halok bo‘ldi. Bu haqda “Fars” nashri xabar bermoqda.

Ma’lum qilinishicha, mahalliy vaqt bilan soat 17:45 da uch nafar qurollangan noma’lum shaxs Shoh-Cherak maqbarasiga hujum qilgan. Qurolli hujum natijasida, mahalliy OAV ma’lumotlariga ko‘ra, kamida 15 nafar tinch aholi halok bo‘lgan. 40 ga yaqin kishi jarohatlangan. Jurnalistlar halok bo‘lganlar orasida yosh bola ham borligini ta’kidlamoqda.

Hozircha jinoiy guruhlarning hech biri hujum uchun javobgarlikni o‘z zimmasiga olmagan.

Polisiya ikki terrorchini hibsga olgan va uchinchisini qidirish davom etmoqda. Mahalliy hukumat vaziyat nazorat ostida ekanini aytmoqda.

Qayd etish mumkin, Shoh-Cherak maqbarasi XIV asrda qurilgan. Maqbara nomi forscha “Nur Rabbiy” degan ma’noni anglatadi, uning ichi noyob oyna mozaikasi bilan bezatilgan.

Shuningdek, maqbara masjid sifatida ishlatiladi va shia musulmonlarining ziyoratgohi hisoblanadi.

• Eron
• Maqbara
• Otishma
• Terakt