Avvalroq, ijtimoiy tarmoqlarda, jumladan, Sevimli telekanalining rasmiy saytida “Paxtakor” stadionidagi O‘zbekiston-Iroq futbol terma jamoalari o‘yni vaqtida telekanal jurnalistlari IIO xodimlari tomonidan kaltaklangani haqida xabarlar tarqalgan edi.

Unda aytilishicha, IIO xodimlari chempionatni yoritishga borgan jurnalist va tasvirchini akkreditatsiyadan o‘tkazilganiga qaramay ularni stadionga kiritmagan.

Shundan so‘ng, ijodiy guruh kiritmagani uchun o‘zining eʼtirozlarini bildirgan va stadion oldidagi holatni tasvirga olishni boshlagan. Organ xodimlari esa tasvirchining ruxsatnomasiga chang solgan, kamerasini tortib olgan, tasvirchining qo‘lini orqaga qayirib, jurnalistdan uzoqlashtirgan.

Mazkur holat yuzasidan IIV Matbuot kotibi Shohrux G‘iyosov vazirlikning rasmiy munosabatini bildirib, unda joriy yil 11 iyundagi futbol uchrashuvida IIO va Milliy gvardiya xodimlari tomonidan soat 21:00dan keyin, stadionda bo‘sh joylar qolmaganligi sababli, fuqarolarni stadionga kirishi to‘xtatilgani va shu vaqtda, Alisher Navoiy ko‘chasi tarafdan stadionga kirish uchun tashkil etilgan tashqi nazorat perimetrda ayrim fuqarolar norozilik bildirib, stadionga kirishga harakat qilib, janjal uyushtirganini aytadi.

Shuningdek, xodimlar tomonidan kelib chiqishi mumkin bo‘lgan bezorilik harakatlari zudlik bilan bartaraf etilib, bir nechta fuqarolar tuman IIBga olib borilgan.

IIV talqiniga ko‘ra, mazkur fuqarolar orasida “Sevimli” telekanali “Zamon” dasturining vakillari ham bo‘lgan hamda odamlar o‘rtasidagi mushtlashuv jarayonida telekanal operatori T.Ibroximovga tan jarohatlari yetkazilib, texnik ashyolari zarar ko‘rgan. Unga o‘z vaqtida tibbiy yordam ko‘rsatilib kasalxonaga yetkazilgan. 

Shu kuni boshqa fuqarolardan tan jarohati olganligi bo‘yicha maʼlumotlar kelib tushmagan.

Hozirda, holat yuzasidan tekshiruv tayinlanib, jamoat tartibini buzgan fuqarolarni aniqlash bo‘yicha ishlar olib borilmoqda.

Mazkur holat bo‘yicha, o‘z navbatida, Prezident Administratsiyasi huzuridagi Axborot va ommaviy kommunikatsiyalar agentligi ham munosabat bildirib, ayni vaqtda o‘z vakolati doirasida Ichki ishlar vazirligi, Bosh prokuratura hamda Milliy gvardiyaga so‘rov yuborganini maʼlum qildi. 

AOKA, shuningdek, “ayni paytda davom etayotgan xizmat tekshiruvi natijalarini sinchkovlik bilan kuzatib borishi”ni bildiradi. Biroq, IIV munosabatida xodimlarga nisbatan xizmat tekshiruvi tayinlangani haqida biror jumla uchramaydi.

Milliy gvardiya ham “telekanali xodimlariga tan jarohati yetkazishga aloqador shaxslar aniqlanayotgani va tekshiruv natijalariga ko‘ra, aybdor deb topilgan shaxslarning harakatlariga huquqiy baho berilishini maʼlum qilgan, xolos.

• IIV
• Milliy gvardiya
• Munosabat
• xabar