Toshkentning “Lokomotiv” klubi rahbariyati va murabbiylar o‘rtasida yangi mavsumga munosib ishtirok etish uchun yig‘ilish bo‘lib o‘tdi va jamoaga rasman yangi bosh murabbiy tayinlandi.

So‘ngi bir necha yil davomida “temiryo‘lchilar”ning yoshlar va o‘rinbosarlariga ustozlik qilgan Denis Korostichenko asosiy jamoa bosh murabbiyi etib tayinlandi. Jamshid Saidov esa 2022-yilgi mavsumda unga yordamchi sifatida faoliyat yuritadi.

O‘zbekiston terma jamoasining sobiq himoyachisi Akmal Shorahmedov karyerasini yakunlab, toshkentliklarning murabbiylar shtabida ishlaydigan bo‘ldi.

Shuningdek, Andrey Miklyayev va Alisher Ahmedovlar ham “Loko”da ishlarini davom ettirishadi.

Eslatib o‘tamiz, yakunlangan mavsumda “Lokomotiv”ni portugaliyalik mutaxassis Mikael’ Sikeyro boshqargandi va mavsum tugamasdan u klubni tark etdi.

• Futbol
• O‘zbekiston
• Sport