Fransiya prezidenti Emmanuyel Makron mamlakatda keng ko‘lamli noroziliklarga sabab bo‘lgan pensiya islohoti to‘g‘risidagi qonunni ma’qulladi. Bugun, 15-aprel kuni hujjat “Journal officiel de la République français” gazetasida chop etildi.

“Ijtimoiy sug‘urta kodeksiga o‘zgartirishlar kiritilmoqda. <…> birinchi xatboshidagi “oltmish ikki” so‘zlari “oltmish to‘rt” degan so‘zlar bilan almashtirildi”, – deyiladi hujjat matnida.

Mamlakatning bir qancha shaharlarida pensiya yoshini oshirishga qarshi mitinglar bo‘lib o‘tdi. Xususan, aksiyada kamida to‘rt ming kishi ishtirok etgan Parijda boshlangan tartibsizliklar oqibatida 112 kishi hibsga olingan.

Mart oyida Fransiya bosh vaziri Elizabet Born pensiya yoshini 62 yoshdan 64 yoshga ko‘tarish haqidagi qonun parlamentda ovoz berishsiz qabul qilinishini ma’lum qilgan edi. Fransiya parlamenti quyi palatasi a’zolari ikki marta hukumatga ishonchsizlik votumini qo‘yish va islohotni to‘xtatishga harakat qilishdi, biroq ikkala holatda ham ovoz berish muvaffaqiyatsiz tugadi.

Joriy yil 14-aprelda islohotning asosiy qoidalari mamlakat Konstitutsiyaviy kengashi tomonidan ma’qullandi. Shundan so‘ng pensiya yoshini oshirish haqidagi qonunga qarshi chiqqanlar Makrondan hujjatni imzolamaslikni talab qilishdi. Prezidentda qonunni imzolash uchun 15 kun bor edi.

Qonun qabul qilingandan keyin muxolifat islohotni bekor qilishga intilishda davom etishini bildirdi.

• Fransiya
• norozilik
• pensiya