Eron oliy rahnamosi Oyatulloh Ali Xomanaiy Binyamin Netanyaxuga o‘lim jazosi berish kerakligini aytdi, deya xabar bermoqda Reuters nashri.

“Xalqaro jinoiy sud hibsga olish uchun order bergan, bu yetarli deb o‘ylamayman. Bu jinoiy yetakchiga o‘lim jazosi berilishi kerak”, – degan Xomanaiy.

Avvalroq Xalqaro jinoiy sud Netanyaxuni G‘azodagi harbiy jinoyatlari uchun hibsga olishga order bergan edi. Ushbu qaror 2023-yil 8-oktyabrdan 2024-yil 20-mayga qadar sodir etilgan “insoniyatga qarshi jinoyatlar va harbiy jinoyatlar” yuzasidan qabul qilingan. 

Isroil Falastindagi vaziyat bilan bog‘liq ishlar bo‘yicha XJS yurisdiksiyasiga qarshi chiqmoqda.

Aksariyat isroillik siyosatchilar bu qarorni keskin qoralashgan.

Isroil prezidenti Isaak Gersog Xalqaro jinoiy sudning order berish haqidagi qarorini “vijdonga to‘g‘ri kelmaydigan va hayratga soladigan” deb atagan.

Netanyaxu maslahatchisi Dmitriy Gendelman Xalqaro jinoiy sudni Isroil pozitsiyasiga e’tibor bermaganlikda va Eron boshlagan mojarolarni qo‘llab-quvvatlaganlikda ayblagan.

• Binyamin Netanyaxu
• Eron
• Isroil
• Xalqaro jinoyat sudi