Nepal tog‘larida bortida xorijlik sayyyohlari bo‘lgan samolyot yo‘qolib qoldi. Tara Air kompaniyasiga tegishli bo‘lgan kichik hajmli samolyot 22 nafar yo‘lovchisi bilan Katmandudan 200 kilometr masofadagi Poxara shahridan Jomso shahri tomon yo‘lga chiqqan edi. Yo‘lovchi samolyot havoga ko‘tarilganidan bir necha daqiqa o‘tib, radarlardan yo‘qolib qolgan.

Qidiruv ishlari noqulay ob-havo sharoitlari sababli maʼlum vaqt to‘xtatib qo‘yilgan.

 “Tara Air kompaniyasining Twin Otter nomli samolyoti Poxara aeroportidan Jomsoga mahalliy vaqt bilan soat 9:55 da uchgan edi. Samolyot bortida 19 nafar yo‘lovchi va 3 nafar ekipaj aʼzosi bo‘lgan. Ekipaj bilan aloqa taxminan 15 daqiqalardan so‘ng yo‘qolib qoldi”, – deydi Tara Air aviakompaniyasi rahbari Sudarshan Bartaula.

Sudarshan Bartauluning so‘zlariga ko‘ra, samolyot tog‘ga qulagan va 100 metr radiusda parchalanib ketgan.

Qutqaruvchilar Nepalda Tara Air aviakompaniyasiga tegishli samolyot halokatidan 14 nafar jasad topdi.

Aniqlanishicha, yo‘lovchilar orasida 6 nafar xorijlik, jumladan, 4 nafar hindistonlik va 2 nafar germaniyalik fuqarolar bo‘lgan.

Voqea joyiga Nepal harbiylaridan iborat qutqaruvchi guruhlar yetib borgan.

Mahalliy aholining taʼkidlashicha, halokat Manapati-Himal tog‘ida ro‘y bergan. Ularning fikricha, fojiaga yomg‘ir sabab bo‘lgan bo‘lishi mumkin.

Nepalning ushbu tog‘li hududida so‘nggi haftada sinoptiklar yomg‘ir yog‘ishini qayd etgan, biroq mutasaddilar bu hududdan o‘tuvchi havo kemalarining parvozlarini taqiqlamagan. Poxara – Jomso yo‘nalishi bo‘yicha samolyotlar Himoloy tog‘lari cho‘qqilari orasidan uchib, so‘ngra vodiyga qo‘nadi.

• Aviahalokat
• Nepal