Toshkent viloyati Olmaliq shahrida joylashgan umumta’lim maktablaridan birida 10-sinfda tahsil olgan o‘quvchi qiz vafot etdi.

Nemolchi.uz xabariga ko‘ra, o‘quvchining o‘limiga kuchli stress sabab bo‘lgan.

“Maktabda yuqori sinf o‘quvchisi bo‘lgan bir qiz haqida noxush mish-mishlar tarqalgan edi. Bu qiz ota-onalar qo‘mitasi vakilining yo qarindoshi, yo tanishi bo‘lgan. U yolg‘on bahona bilan ichki ishlar xodimlarini chaqirtirib, qizlarga qo‘pol ohangda, baland ovozda “ma’ruza” o‘qiy boshlagan. So‘ngra mish-mish tarqatishda “gumon qilingan” qizlarni suhbat uchun alohida xonaga chaqirishgan. Mening farzandim ham shu yig‘ilishda edi. Men va ko‘plab ota-onalar g‘azabdamiz. Qanday qilib bolalarni ota-onalar va psixologlarni ogohlantirmasdan yig‘ish mumkin? Qaysi huquq bilan bu ota-ona huquq-tartibot idoralari xodimlari (erkaklar) huzurida bizning bolalarimizga baland ovozda dashnom beradi, ustiga-ustak noqulay savollar berishga jur’at etgan o‘qituvchini ishdan bo‘shatish bilan qo‘rqitishga haddi sig‘adi?”, — deydi marhum qizning onasi.

Manbaga ko‘ra, suhbat jarayonida asosan mas’ul shaxslar tomonidan o‘quvchilarga keskin va baland ovozda murojaat qilingan. O‘quvchi qiz ushbu holatni og‘ir qabul qilishi oqibatida kuchli ruhiy bosimga uchragan.

Shuningdek, mazkur hodisa yuzasidan Toshkent viloyati Maktabgacha va maktab ta’limi boshqarmasi rasmiy munosabat bildirdi. Ma’lumotlarga ko‘ra, voqea 2026-yil 28-yanvar kuni Olmaliq shahridagi 5-sonli umumta’lim maktabida yuz bergan. Maktabning 10-sinf o‘quvchisi (2009-yilda tug‘ilgan) K.Y. maktab yo‘lagida hushini yo‘qotgan. Dastlabki tibbiy yordamlarga qaramay vafot etgan.

Boshqarma ma’lumotiga ko‘ra, ayni paytda huquq-tartibot organlari tomonidan hodisa yuzasidan surishtiruv ishlari olib borilmoqda. Yakuniy xulosalar rasmiy tekshiruvlar nihoyasiga yetgach e’lon qilinadi.

• Maktab
• O‘quvchi
• Toshkent viloyati