O‘zbekistonda vodorod gazida harakatlanuvchi transport vositasi ishlab chiqiladi. Bu haqda Innovatsion rivojlanish vazirligi ma’lum qildi. 

Innovatsion rivojlanish vazirligi tomonidan ishlab chiqilgan “Vodorod energetikasi texnologiyalari sohasida vodorodni olish, saqlash va tashish texnologiyalarini yaratish bo‘yicha ilmiy-tadqiqot ishlari dasturi” Vazirlar Mahkamasi tomonidan tasdiqlandi.

Dasturga muvofiq, quyoshning mujassamlashgan yorug‘lik oqimining issiqligi ta’sirida va katalizatorlar yordamida vodorod olish texnologiyasi yaratiladi va uning asosida 1700 darajagacha haroratda termokimyoviy usulda vodorod olish qurilmasining tajriba namunasi ishlab chiqiladi.

Shuningdek, ammiak va vodorodli yoqilg‘i elementlaridan foydalangan holda vodorod gazida harakatlanuvchi transport vositasining tajriba namunasi ishlab chiqiladi.

“Yashil" vodorod yoqilg‘isidan issiqlik va elektr energiyasini olishga mo‘ljallangan tajriba-pilot qurilmasi yaratiladi.

Ta’kidlanishicha, olib borilayotgan izlanishlar natijasida vodorod yoqilg‘isidan foydalanish qazilma uglevodorod yoqilg‘ilaridan foydalanish jarayonlari bilan iqtisodiy jihatdan raqobatlasha oladigan bo‘lgandan so‘ng, vodorod energetikasidan yirik sanoat ko‘lamida foydalana boshlanadi.

Ekspertlarning prognozlariga ko‘ra, 2050-yilga kelib jahon energetikasidagi vodorod energiyasining ulushi 18 foiz, asr so‘ngiga kelib 40 foizdan ortiqni tashkil etishi kutilmoqda.

Vodorod – ideal yoqilg‘i bo‘lib, birinchidan, u borliqdagi eng keng tarqalgan element sanaladi. 

Ikkinchidan, uning yonishida katta miqdorda energiya hosil bo‘ladi va biror-bir zararli gazlar ajralib chiqmaydi, faqat toza suv hosil bo‘ladi. 

• Innovatsiya
• Transport
• yoqilg‘i