“Zamon” informatsion dasturida ma’lum qilinishicha, Samarqanddagi maktabda ayol 1-sinf o‘quvchilarini urgani yuzasidan ma’muriy bayonnoma rasmiylashtirilib, qonuniy qaror qabul qilish uchun sud organlariga yuborilgan. Holat 3-aprel kuni Samarqand viloyati Qo‘shrabot tumanida joylashgan 53-umumta’lim maktabida sodir bo‘lgan. 1-sinf o‘quvchilari dars mashg‘ulotlari tugagach, maktabdan uylariga ketayotgan vaqtida o‘zaro nizolashgan. 6-aprel kuni kaltak yegan o‘quvchining 45 yoshli onasi maktabga kelib, sinfda o‘quvchilar oldida janjal ko‘tarib, o‘g‘lini urgan sinfdoshlarini ta’qib etib, ularni kaltaklagan. O‘qituvchining so‘zlariga ko‘ra, sinfdoshlar janjalidan xabar topgach, bolalarning ota-onalarini chaqirtirgan. O‘qituvchining ma’lum qilishicha, u uchala bolaning ota-onalari bilan gaplashib, vaziyatni o‘rganishgan. “Uzr so‘raymiz, o‘g‘limiz shunaqa qilib qo‘yibdi”,– dedi”, – deya ta’kidladi o‘qituvchi. Keyin sinfga kirib borganida o‘g‘li kaltaklagan ayol ularni kutib turgan bo‘lgan. O‘g‘lini qaysi bola urganini so‘ragach, janjal boshlanib ketgan.

“Kelgan vaqtimda urgan bolalarning onalari meni kulib qarshi oldi. Ularni ko‘rib mening jahlim chiqdi. “Ravshan kim?”, dedim. “Tur bolam”, – dedi Ravshanning onasi. Men u bolalarni tanimayman ham. Jahlim chiqqandan ularni urib ketdim. Men onaman. O‘zimni bosolmasdan u bolajonlarni urib yubordim. Qilgan ishimdan afsusdaman. Bunday holat takrorlanmasligini xohlayman”, – degan aybdor ona.

Mazkur holat yuzasidan Qo‘shrabot tumani ichki ishlar bo‘limi tomonidan uch nafar voyaga yetmagan shaxsning ota-onalariga nisbatan Ma’muriy javobgarlik to‘g‘risidagi kodeksining 47-moddasiga (bolalarni tarbiyalash va ularga ta’lim berish borasidagi majburiyatlarni bajarmaslik) asosan ma’muriy bayonnoma rasmiylashtirilgan. Shuningdek, bolalarni urgan ayolga nisbatan Ma’muriy javobgarlik to‘g‘risidagi kodeksining 52-moddasiga (yengil tan jarohati yetkazish) asosan ma’muriy bayonnoma rasmiylashtirilib, qonuniy qaror qabul qilish uchun sud organlariga yuborilgan.

• Bolalar
• Maktab
• Ota-ona
• Samarqand
• Sud