Samarqand viloyati IIBning ma’lum qilishicha, 2024-yil 23-iyul kuni soat 17:30 larda Samarqand shahar Siyob mahallasida yashovchi fuqaro navbatchilik qismining 102 qisqa raqamiga murojaat qilib, Oqdaryo tumani “Navro‘z” mahallasi Zarafshon ko‘chasida joylashgan ko‘p qavatli uylar oldida notanish fuqarolar unga tegishli Nexia-3 rusumli avtomashinasining oynalarini sindirib, o‘zini urib, tan jarohati yetkazganligini ma’lum qilgan.

Ushbu chaqiruvga asosan Oqdaryo tumani ichki ishlar bo‘limi inspektori katta leytenant O‘tkir Burqiyev voqea joyiga yetib borgan. Janjal qilgan fuqarolarni esa “Navro‘z” mahallasida joylashgan xizmat xonasiga olib borgan. Shundan so‘ng, holatga aniqlik kiritish maqsadida murojaat qilgan fuqaro bilan suhbatlashib turgan vaqtida huquqbuzarlar 35 va 19 yoshli yigitlar hamda 45-50 yoshlar atrofidagi ayol “nima uchun xizmat xonasiga birinchi bizni kiritmaysan, biz ham 102 raqamiga murojaat qilganmiz”, deya janjal ko‘taradi. Inspektor ishiga xalal bermay turishini, navbat bilan gaplashishini aytgan vaqtida ular xodimni haqoratli so‘zlar bilan so‘kib, xonadan chiqib ketadi.

Inspektor ularga ketib qolmasligini, qolaversa, holat bo‘yicha tushuntirish xatlari olishi lozimligini aytgan vaqtida, ayol kishi kelib xodimning kiyimidan tortib qattiq haqoratlaydi. G‘azabi qaynagan ikki erkak mushtiga zo‘r berib, profilaktika inspektorini urib-tepadi va yiqitib tanasining turli joylariga tan jarohati yetkazadi.

Voqeadan so‘ng uchala fuqaro ham o‘zlariga tegishli bo‘lgan avtomashinaga o‘tirib, voqea joyidan ketadi.

Hozirda holat yuzasidan Oqdaryo tumani prokuraturasi tomonidan jinoyat ishi qo‘zg‘atilib, 3 nafar gumonlanuvchilar protsessual tartibda qamoqqa olingan.

• IIB
• Janjal
• Samarqand