Oʻzbekistonlik yarimhimoyachi Oston Oʻrunov “Spartak”ni tark etadi.

“Qizil-oqlar” matbuot xizmatining xabar berishicha, 21 yoshli futbolchi bilan tuzilgan kelishuv tomonlar kelishuviga koʻra bekor qilingan.

“Ostonga kelgusi faoliyatida omad tilaymiz!” — deb yozadi Moskva klubi matbuot xizmati.

Keltirilishicha, Oston Oʻrunov faoliyatini Rossiya Premyer-ligasining boshqa klubida davom ettiradi.

Oʻzbekistonlik yarimhimoyachi erkin agent sifatida “Ural” safiga qoʻshiladigan boʻldi. Oʻrunov bugun yoki ertaga shartnoma imzolash uchun Yekaterinburg shahriga yetib boradi.

Bu xabarni “Ural” prezidenti Grigoriy Ivanov ham tasdiqlagan.

“Shartnoma imzolasak, bu haqda rasman eʼlon qilamiz. Qarorgohimizga yetib kelsin, koʻramiz. Ha, biz muzokara oʻtkazdik.

Endi uni kutamiz. U qanday holatda hali bilmaymiz. Agar u asosiy tarkibda oʻynaydigan sport formada boʻlsa, 1,5 yillik shartnoma imzolaymiz. U milliy jamoasida oʻynagan boʻlsa-da, klubida oʻynamadi. Bugun yoki ertaga kelsin, barchasi maʼlum boʻladi”, – deydi yekaterinburgliklar klubi rahbari.

Qayd etish mumkin, Oʻrunov 2020-yilda “Spartak” safiga oʻtib, 9 ta oʻyinda 1 ta gol urgan. Keyin esa ijara asosida “Ufa”da harakat qilgandi.

Maʼlumot uchun, “Ural” RPL 7-turidan keyin 1 ochko bilan soʻnggi 16-oʻrinda bormoqda.

• Futbol
• Legionerlar
• Oston Oʻrunov
• Transferlar