Jizzax viloyati IIB tomonidan o‘tkazilgan tezkor tadbirda Telegram messenjerida voyaga yetmaganlar ishtirokidagi axloqsiz va pornografik mazmundagi materiallarni tarqatgan shaxs aniqlandi. Bu haqda Kiberxavfsizlik markazi xabar qildi.

U o‘zining 442 nafar obunachisi bo‘lgan kanali orqali 403 turdagi bolalar pornografik materiallarini tarqatgan.

“Qiziqish yuzasidan shunga o‘xshash Telegram kanalga qo‘shilganimdan so‘ng, o‘zim ham kattalar va voyaga yetmaganlar ishtirokidagi turli xil pornografik videolar mavjud bo‘lgan kanal yaratishga qaror qildim. Qilgan ishimdan afsusdaman”, — deydi gumonlanuvchi.

Qo‘lga olingan ikkinchi shaxs Toshkent viloyatida yashovchi 21 yoshli yigit Telegram messenjerida qizlar nomidan 6 ta kanal ochib, u yerga jami 3750 ta pornografik material joylashtirgan. Ma’lum bo‘lishicha, u boshqa ijtimoiy tarmoqlarda 837 nafar shaxsga voyaga yetmaganlar ishtirokidagi pornografik mahsulotlarni sotib, 29,2 mln so‘m daromad olgan.

Mazkur holatlar yuzasidan Jinoyat kodeksining 130-moddasi 3-qismi (Pornografik mahsulotlarni tayyorlash, olib kirish, tarqatish, reklama qilish, namoyish etish) bilan jinoyat ishlari qo‘zg‘atilib, gumonlanuvchilarga nisbatan qamoqqa olish tarzidagi ehtiyot chorasi qo‘llanilgan.

• Bolalar
• Jizzax
• Pornografiya