Taxminan 10 soat oldin blokdan chiqarilgan AQShning sobiq prezidenti Donald Trampning Twitter ijtimoiy tarmog‘idagi akkaunti allaqachon 52 milliondan ortiq obunachiga ega bo‘ldi.

2021-yil 8-yanvarda cheksiz muzlatish vaqtiga kelib, @realDonaldTrump sahifasi deyarli 90 million obunachiga ega edi.

Toshkent vaqti bilan 15.05 holatiga ko‘ra, Tramp obunachilari soni 52,1 million kishini tashkil etdi.

Trampning oʻzi hali hech narsa yozmagan, biroq sahifa avvalgi barcha nashrlar bilan koʻrinadigan boʻldi va foydalanuvchilar obuna boʻlish, sharhlar va layk qoldirish imkoniga ega. Trampning so‘nggi posti 500 mingdan ortiq “layk”ga ega bo‘ldi.

Akkauntni qayta tiklash qarorini ijtimoiy tarmoq egasi Ilon Mask , uning so‘rovnomasida qatnashgan 15 million ishtirokchining deyarli 52 foizi unga ovoz berganidan so‘ng qabul qildi.

Twitter Trampni 2021-yil 6-yanvardagi voqealardan so‘ng, uning tarafdorlari demokrat Jo Baydenning prezidentlik saylovidagi g‘alabasini Kongress ma’qullashiga xalaqit berish maqsadida Kapitoliy binosiga bostirib kirganidan so‘ng bloklagan. Trampning o‘zi avvalroq Twitter’ga qaytmasligini va o‘zining Truth Social ijtimoiy tarmog‘iga sodiq qolishini ma’lum qilgan edi.

• Tramp
• Twitter