Rossiya tomonining Zaporojyedagi AESga yorug‘lik raketalari bilan zarba bergani aytildi.

Ukraina tashqi ishlar vaziri Dmitriy Kuleba Twitter'dagi sahifasida Rossiya armiyasi Yevropadagi eng yirik atom elektrstansiyasi bo‘lgan AESni har tomondan o‘qqa tutayotganini, zudlik bilan o‘t ochishni to‘xtatish zarurligini yozdi.

Ma’lum qilinishicha, Atom elektr stansiyasi hududi o‘qqa tutilishi natijasida o‘quv majmuasi binolaridan biri yongan. Yong‘in besh qavatli binoning 3, 4, 5 qavatlarini qamrab olgan.

“Agar portlasa, u Chernobildan 10 baravar katta bo‘ladi. Rossiya darhol o‘t ochishni to‘xtatishi, o‘t o‘chiruvchilarga ruxsat berishi, xavfsizlik zonasini tashkil qilishi kerak", – deb yozib qoldirgan Ukraina TIV rahbari.‌‌

Zaporojye AES direktor vazifasini bajaruvchi Igor Murashov esa holat haqida bayonot berib, AESda yadro xavfsizligi buzilgani, hujum oqibatida reaktorlar xavf ostida qolganini ma’lum qilgan.

AES hududini o‘qqa tutish to‘xtaganidan so‘ng yong‘inni o‘chirishga 40 kishi va 10 ta texnika jalb qilingan.

Ukraina prezidenti esa Zaporojye AESdagi vaziyatni jahon yetakchilari – AQSh prezidenti Jo Bayden, Germaniya kansleri Olaf Shols, Yevropa kengashi rahbari Sharl Mishel, Buyuk Britaniya bosh vaziri Boris Jonson, Polsha prezidenti Andjey Duda, MAGATE rahbari Rafael Grossi va boshqa davlatlar bilan muhokama qildi.

“Ukraina hududida 15 ta atom energetika bloki mavjud.  Agar hammasi portlasa,  bu butun Yevropani evakuasiya qilish degani,  hamma narsaning oxiri degani,  Yevropaning oxiri degani”, – deydi Zelenskiy o‘zining xalqqa videomurojaatida.

Ukraina favqulodda vaziyatlar davlat xizmati ma’lumotlariga ko‘ra, yong‘in maydoni 2000 kvadrat metrni tashkil etgan. Dastlabki ma’lumotlarga ko‘ra, qurbonlar va jarohatlanganlar yo‘q.

• AES
• Rossiya
• Ukraina
• Urush