Bugun, 14-noyabr kuni Vladimir Zelenskiy ukrain qo‘shinlari qo‘lga kiritgan mamlakat janubidagi Xerson shahriga keldi. Bu shahar joriy yilning mart oyidan to noyabrgacha Rossiya armiyasi nazorati ostida bo‘lgan Ukrainaning yagona mintaqaviy markazidir.

"Men juda xursandman, buni xalqning munosabatidan bilish mumkin, ularning munosabati sahnalashtirilmagan",– deydi prezident.

Shuningdek, Zelenskiy NATO va boshqa ittifoqchilarga Rossiyaga qarshi urushdagi yordami uchun minnatdorlik bildirgan.

Prezidentning so‘zlariga ko‘ra, Ukraina tinchlikni o‘rnatishga tayyor.

“Biz tinchlikka, butun yurtimiz tinchligiga tayyormiz”,– degan Ukraina yetakchisi.

Avvalroq, Rossiya Mudofaa vaziri Sergey Shoygu Qurolli kuchlarning Xersondan chekinishini ma’lum qilgan edi. Rossiya ushbu shaharni joriy yilning 23-27-sentyabr kunlari o‘tkazilgan “referendum” natijalariga ko‘ra, o‘zining abadiy hududi deya e’lon qilgan edi.

11-noyabr kuni Ukraina Qurolli kuchlari bo‘linmalari shaharga kirib kelgan, 12-noyabr kuni esa Ukraina prezidenti devonining xabar berishicha, viloyat harbiy boshqarmasi, politsiya va xavfsizlik xizmatlari Xersonda ish boshlagan.

• Xerson
• Zelenskiy