Stol tennisini Hindiston va Janubiy Afrikada xizmat qilgan ingliz harbiylari o‘ylab topganini bilasizmi? Ko‘pchilik bu o‘yinning vatani Xitoy deb hisoblaydi. Biroq hozirgi stol tennisiga o‘xshash o‘yin XVI asrdayoq Angliya va Fransiyada mavjud edi. Faqat unda aniq belgilangan qoidalar bo‘lmagan. Bu o‘yin ping-pong nomi bilan mashhur.
Harbiylar dastlab, raketkalar o‘rniga sigaret qutilaridan, sharik – koptokcha o‘rniga shisha qopqoqlaridan va tennis stolidagi to‘rlar o‘rniga kitoblardan foydalanishgan. Ping-pongning rivojlanishiga 1900-yilda AQShdan ichi bo‘sh sellyuloid to‘plarini olib kelgan ingliz Jeyms Gibb katta hissa qo‘shgan.

“Ping-pong” nomining kelib chiqishiga oid tarixiga oid aniq faktlar ma’lum emas. Uni Gibbning o‘zi ixtiro qilgan deb ishoniladi. Ammo bu nom 1901-yilda “Jon Jak va uning o‘g‘illari” kompaniyasi tomonidan kiritilgan. Ushbu kompaniya “Ping-pong” nomini rasmiy ravishda ro‘yxatdan o‘tkazib, patent olgan va Amerikada ushbu o‘yin uchun sport anjomlari ishlab chiqarishni yo‘lga qo‘ygan “Parker brazers” kompaniyasiga bu nomdan foydalanish huquqini bergan.

Oradan hech qancha vaqt o‘tmay, stol tennisi mashhurlikka erishdi. 1901-yil 12- dekabrda Buyuk Britaniyada stol tennisi assotsiatsiyasi tashkil etildi.

O‘tgan asrning boshlarida stol tennisi qoidalari yana-da murakkablashdi. Biroq o‘yin hali alohida sport turi maqomini olmagan edi. Ushbu o‘yin, asosan, britaniyalik aristokratlar tomonidan kechki ovqatdan keyin va faqat o‘yin-kulgi ko‘rinishida o‘tkazilardi. XX asr boshlaridagi o‘yin qoidalariga ko‘ra, o‘yin paytida erkaklarga kostyum, ayollarga esa ko‘ylak kiyishga ruxsat etilmagan.

O‘sha paytlarda stol tennisidagi raketka ushlagichlari uzun, yuzasi keng va nok shakliga o‘xshash bo‘lgan.

1920-yillarda Angliya va Uelsda stol tennisi mashhurligining yangi davri boshlandi. Yevropa assotsiatsiyalari va Uzoq Sharq mamlakatlarida milliy birlashmalar paydo bo‘ldi. Bu esa qoidalarni xalqaro miqyosda standartlashtirish muammosini hal qilishga imkon berdi. 1926-yilda Xalqaro stol tennisi federatsiyasi tashkil etildi, bir yildan so‘ng Londonda stol tennisi bo‘yicha birinchi jahon chempionati bo‘lib o‘tdi.

1988-yilda stol tennisi Olimpiya o‘yinlariga kiritildi. Bugungi kunda u dunyodagi eng mashhur sport turlaridan biri bo‘lib, 850 milliondan ortiq muxlislariga ega. Bu o‘yin, ayniqsa, Xitoyda ommalashgan.